【搵錢絕技大放送】想發達作戰守則 首戒餐搵餐食餐餐清

從前有兩個爸爸， 一個係窮爸爸，另一個係富爸爸。窮爸爸教仔：「最緊要搵食搵得快！」富爸爸就教仔：「唔好心急，最緊要長做長有！」

窮爸爸個仔長大後成為獵人，餐搵餐食餐餐清。阿富爸爸個仔大個成為農夫，日日喺度等收成。獵人連續幾次打獵收穫好好，之後就決定買咗好多飛機大砲，幫佢增加收穫。 農夫一樣連續幾年豐收，佢都決定買多啲地去耕田。可惜好景不常， 阿獵人發覺啲動物醒咗好多，唔知走曬去邊度，打唔成獵，最後又要炒曬成條軍隊，變賣曬啲飛機大砲， 還原返做one man band。農夫呢？雖然間中都有啲風災旱災，但由於佢專種啲禦寒能力較強嘅農作物， 一般每年每季都有穩定嘅收成。有一日大家相遇，獵人就只係揸住支槍，農夫就已經有好多畝地啦。

做生意你要搞清楚你係一個獵人定係一個農夫？ 最大嘅分別就係你班客係咪重覆性購買，佢嘅顧客終生價值（Customer Lifetime Value）有幾大。 顧客終身價值就係顧客呢一世都會畀幾錢你賺。

如果顧客幫襯完你一次，下次唔知幾時再返嚟㗎話，你只係一個獵人。即使今個月條數好好，下個月分分鐘係零。咁樣嘅生意好難做計劃。例如你開間寵物店，只係賣狗賣貓，顧客買完之後，唔知幾時會再買下一隻。或者你開間花店，顧客入嚟買束花就走啦。賣傢俬，新屋入伙買完一次又無啦。做呢啲生意要好小心，如果你一賺到錢就發大嚟做，買晒飛機大砲咁，萬一市況逆轉，班客失蹤咗，你更容易執笠。

如果你班客係重覆性購買，顧客終生價值係遠遠高過第一張單的話，恭喜你，你係一個農夫。啱啱開始嘅時候辛苦啲，要儲客，但只要你過咗某個收支平衡點，之後通常年年都有錢賺。例如開間迷你倉公司，每個月有租收。行會員制收月費，收夠某個會員數量，一樣每個月有錢賺 。做補習社，每個月都有學費收。做速遞公司，日日都有文件送。做寵物店，唔好咁著重賣貓狗，嘗試做多啲寵物美容，因為寵物每個禮拜都要沖涼。花店都好，做多啲公司及酒店客，因為佢哋個個禮拜都要換花。點解我做商舖基金？因為每個月都有基金管理費同埋租金收入。

做生意你揀支槍定係個鋤，做獵人定係農夫 ？考慮完顧客終生價值（Customer Lifetime Value），就你諗你啦。

撰文：李根興

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...