Likes
25
per views
1%
Dislikes
0
per views
0%
Comments
3
per views
0.1%
三人行 小鐵漢爸媽 由懷孕起計，小鐵漢與爸媽相遇不過兩年，已經歷了多次生關死劫。媽媽Doris做產檢時發現BB的心臟發育不全，醫生婉轉地問：「你有冇其他諗法?」「嗰陣都已經五個月，佢可以由咁細粒養到咁大，生命力應該好強，所以冇諗過唔要。雖然都知會好辛苦啦。」 自此三人不停出入醫院。小鐵漢現時一歲零兩個月，已很懂得使計攫取自己想要的。身軀瘦小與古惑的靈魂不太相稱，手術疤痕更顯得粗獷。爸爸Jayco在自己的胸口紋上同樣的圖案，「我嗰仔條疤痕要揹住一世，我要教佢點面對。如果就咁用口講，佢會話：你都冇，點知我點諗啫？我想同佢擁有相同嘅嘢。」 －－－ Jayco的紋身花了四小時、一次過完成，「其實我好怕痛。」小鐵漢的手術疤痕現時縱跨半個身軀，長大後比例會縮短，爸爸的卻不會變，「父子裝」他日此消彼長，「想鼓勵佢、話佢知我哋成家人都支持佢。」 女人天生比男人更能忍受痛楚。懷孕至三十四周，Doris出現早產跡象。小鐵漢一出世便要做手術，如果早產，那一刀恐怕更難捱，「入醫院瞓咗幾日，要禁食、吊鹽水，成個人都抽乾晒；打咗幾支強肺針，真係好痛好痛。」醫院半夜不時傳來病人的呻吟聲，令她更不安，「我同佢講，你千祈唔好咁快出嚟。」 結果小鐵漢等到三十九週才呱呱墜地，算是超額完成。臨盤時，Doris反而不覺得怎樣痛了。但BB的情況比預計的更壞：左邊心比右邊大，心瓣也不齊全，令血液倒流。此時醫生又問：「其實佢都好嚴重 。嗰時你都諗住生?」「係，要俾個機會佢爭取。」小鐵漢全身插滿喚管，靠呼吸機維持，出世時那6.3磅肉轉眼便消耗得肋骨盡現。第一次開腔手術效果不理想，要推倒重來，「醫生捉咗我哋入房，傾咗一輪。佢話手術應該得10%機會成功，不如唔好要佢受一刀先離開，由佢就咁算吧。」Doris忍不住爆喊，但二人都不願放手，「始終10%都係機會。」 第二次手術成功，但傷口大得難以承受，小鐵漢對那張掛滿喉管的病床更是抗拒，「佢喺醫院係咁喊、冇笑過。要抱住佢行來行去，唔可以接近張床。結果係大人冇得瞓。」Doris每日來回天水圍的家和瑪麗醫院，身心俱疲，難免胡思亂想。新手媽媽愛在whatsapp群組圍爐取暖，但她受不了那種氣氛，「其他人send啲小朋友相出嚟，咁健康，咁得意。望住佢瞓喺醫院，就好唔開心。」唯有退場。「Facebook唔玩、朋友都唔想搵，因為冇心情。自己無啦啦喺街都會喊，情緒好唔穩定。」幸好老公是個高質的出氣袋，「俾佢鬧吓囉。發洩完就冇嘢。」 到五個月大，小鐵漢終於回家，Doris要獨力照顧他，「初頭都好驚。又冇氧氣、又冇醫生護士，但習慣咗又冇想像中咁難，細心啲就OK。」BB每次要吃五、六種藥，肺壓、甲狀腺七國咁亂；藥丸要磨粉、開水，再注入針筒，逐一記錄，根本不能假手於人。倆口子有時也會為對方搞亂了針藥而爭拗。但小鐵漢總會俾面媽媽，由她餵藥，再苦也乖乖吞下，「我而家變得好執著，一起身就要拖地，平時冇咁乾淨的。真係放低咗自己，咩都顧咗佢先。」為了趕及在BB睡醒前揼奶，結果天天看日出。 小鐵漢一歲時剛接受了第二階段的手術，待四歲再捱一刀，心臟功能便會回到正常水平，可以跑跳追逐。隨著小鐵漢長大，愛吃薯片的Jayco很快也不能在家開懷大嚼。Doris今年仍未夠三十歲，年輕女孩忽然責任重大，下次旅行更不知要等到何時，「我又冇覺得自己唔好彩。BB揀爸爸媽媽係有原因，佢知我哋錫佢，先會揀我哋。」「只要佢健康就夠了，唔使特別聰明，亦唔使孝順我，哈哈。」 記者：蔡慧敏 攝影：胡智堅 《壹週刊》28周年，無懼風波，堅持敢言，壹直企硬。 2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK 壹週刊 : http://nextplus.hk/ 即 like 壹週刊 fb : http://www.facebook.com/nextmagazinef...
More