【Janice Man預演人妻生活】拍拖4年低調護愛苗 答應求婚後攬住放狗逗小朋友

30歲嘅Janice Man文詠珊，近年專注內地發展亦開始見到成績，以為佢會再衝吓事業，點知突然傳出婚訊，進度更已經去到影完婚紗相、派埋囍帖。原來，35歲嘅富三代才俊未婚夫吳啟楠，早喺上年已經求婚成功，隨即開始秘密籌備婚禮。早前，《壹》仔更捕獲到佢哋兩個預演婚後生活，巧sweet sweet㗎！唔單只攬住放狗閃死啲單身狗，見到途人啲得意小朋友又走埋去眼甘甘，睇怕做咗人妻之後，人母身份亦會隨即而來。
想當年，Janice Man同Angelababy初出道時叮噹馬頭，但Baby好快已經轉戰內地率先跑出，之後又嫁埋內地一線男星黃曉明。無論事業定係婚姻，Janice Man都大落後。好彩，佢近年長駐內地工作，成績火速追貼Baby，四年幾前搵到嘅男友吳啟楠家景亦相當顯赫，阿爺係中共黨員，大伯係前人大代表，老竇涉足免稅事業，自己就同前財爺梁錦松做拍檔搞投資公司。
二人拍拖四年以嚟都好低調，實行小心保護愛苗方針，而且最重要係咩呀？就係據聞吳啟楠對Janice Man全心全意呢樣先至難得呀！女友長駐大陸咩？佢就抽時間飛上去探班。女友想衝事業唔想早婚點算？佢就用誠意搭夠，將Janice Man夢想嘅古堡式婚禮實現，更安排湖畔煙花、現場樂隊，Janice Man想唔應承都唔得啦。
二人身份即將改變，加上有個齋諗都覺得威水嘅婚禮，愛苗？唔使再保護喇，勁sweet sweet咁攬住放狗散步，再逗下人哋啲B仔預習下做人母嘅心情，爽呀！
立即下載《壹週刊》Apps，隨時隨地睇盡時政專題、深度偵查、娛樂熱話！按此連結：http://bit.ly/next28app

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinefansclub