【難忘哭腔唱《傻女》】北漂生活初期無工作 為三餐做清潔賺200元 李日朗：覺得有啲難受

蓋：歡迎今日嘉賓李日朗。
03年簽約英皇娛樂，13年選擇離開，李日朗一個人去咗北京搵出路。
蓋：點解會同唱片公司解除歌手合約？
李：我都唔係解除嘅，只係滿約之後無再續約。
蓋：咁點解唔續約呢？
李：我自己覺得應該咁樣，喺一個地方學咗咁耐，就應該去第二個地方試吓之前學嘅嘢得唔得，然後再學其他嘢，我覺得十年係一個階段。
人生路不熟，加上娛樂圈講的是際遇、人脈，李日朗的北漂生活並不易。
蓋：無做歌手之後去咗邊？好似有段時間消失咗？
李：唔係呀，都係喺北京拍戲。你都知道，香港主要得一間電視台拍劇，如果我唔喺嗰個台拍劇，基本上大家就唔會見到我，所以就去咗北京，已經去咗五、六年。
蓋：發展如何？
李：最初麻麻，之後都開始順利嘅
蓋：麻麻即係咩嘢意思？
李：麻麻即係麻麻囉，我鍾意美化事情。最初的確發展麻麻，因為大家都會覺得如果喺香港有少少人氣，返到內地應該係OK嘅，但其實唔適用喺我哋呢個年代。就算喺香港有少少人氣，但去到北京其實係唔認識你嘅，唔會認同你，所以要喺當地重新開始，去到一個競爭好大嘅市場重新開始，需要花好多時間、心機。不過我覺得自己好幸運，有朋友介紹工作，我都係等咗大概十個月時間就有工作。
蓋：之前呢十個月嘅經濟會唔會好差？
李：當然係好差啦。
蓋：點樣捱？
李：當時有喺北京工作，做吓一啲唔影響平日試鏡嘅工作，例如有喺酒吧工作，又有做清潔。
未搵到演藝工作之前，李日朗話自己會喺酒吧工作，為咗生活，一晚二百蚊嘅清潔工作都會做。
蓋：喺香港已經有一定成績，要喺北京重新開始，信心方面會唔會有好大打擊，或者好低落？
李：其實曾經諗過，當時發生咗一件事，我做緊清潔嘅時候，其實係做大廈外牆洗窗，本身都畏高，但呢份工作係半夜開工，唔會影響我朝早下午去試鏡。當時我喺度諗，其實返嚟香港，去廣東省唱吓夜場，一個月十萬八萬一定會有，點解一定要去一個咁嘅地方，做份一晚得二百蚊嘅工作。
蓋：咁點解呢？
李：當時係覺得有啲難受、有啲蠢，但有一晚見到身邊同事，佢從一啲鄉下地方嚟到北京，佢希望呢份抹窗工作每晚都有工開，然後賺呢份人工，佢每年會坐一次火車返鄉下，本身有老婆仔女，但佢只係同我同齡。我見到佢呢個人嘅夢想就係咁樣，但我唔係咁樣嘛，我知道呢個只係自己一個過程，呢個唔係我嘅結果，我知道經過呢個過程，去追求自己想要嘅結果，但相比係抹窗已經係同事結果嘅時候，我覺得自己都好幸運。由嗰一刻開始我就覺得，其實都唔係好慘，都OK嘅，即係喺對比情況之下，所以就好努力咁做落去，本身都變咗好多，都好慶幸自己去咗北京幾年。
蓋：你返嚟香港之後演咗一首《傻女》，然後又大hit，點解會唱首咁嘅歌？用哭腔去唱，係咪一種發洩形式？
李：其實係發洩形式，不過唔係哭腔，以音樂老師嘅說法，哭腔係一種技巧，但我嗰啲唔係一種技巧。其實只係好似歌劇咁樣，當時做呢首歌就好似外國一啲歌劇，佢哋都會咁樣唱歌，只不過我哋以呢種形式加入流行曲。
蓋：你覺得香港觀眾嘅反應，係因為比較落後，定係你真係行得太前呢？
李：唔係，其實無話落唔落後。
蓋：我都有聽，即時有好多人轉寄畀我。
李：梗係啦，我收到好多電話。其實無話係咪落後，我諗只係大家唔習慣。
蓋：你算係第一個咁樣做？
李：應該係，但可能有啲我哋唔知道啫，可能當年網絡無咁發達，喺香港可能係第一個，但外國其實一早已經有。我諗創作就係做自己鍾意嘅嘢，如果我離開咗咁多年，返嚟之後又係做番之前嘅創作，咁做咩要離開？一定要做啲新嘢，做啲自己想試嘅嘢。
蓋：係咪好難唱？
李：係好難唱。蓋：反應都唔錯？
李：坦白講，有好有壞啦，但無問題喎。
策劃：肥A
攝錄：黃志明、蕭敬漁
化妝：波兒（嫁妝）
服裝提供：levis_hongkong, palladiumhk, memoriginhk

「壹起出手，撐新聞自由！」
立即免費訂閱《壹週刊》
登記成為壹會員，睇盡獨家內容，會員活動！
http://bit.ly/NextSubscrition30
【逐步教學】立即登記訂閱《壹週刊》！ 免費無阻睇盡全部精彩內容
http://bit.ly/2UWG7hI [/c]

壹週刊 : http://nextplus.hk/
即 like 壹週刊 fb : http://www.facebook.com/nextmagazinefansclub