【馬逢國支gel】撻朵過後被瘋狂抽水 馬逢國支gel原來賣……

立法會體育、演藝、文化及出版界議員馬逢國，上星期被揭發喺香港機場離境嗰陣，隨身行李有支容量二百毫升嘅髮型啫喱，違反機管局要求乘客帶唔超過一百毫升嘅液體或者凝膠登機嘅規定。佢同機場保安人員理論之餘，仲懷疑撻朵表明立法會議員身分，同話自己識得機管局主席林天福，令事件成為一六年「行李門」翻版。

事後馬逢國雖然就事件道歉，不過無阻網友發功，搞髮型設計比賽抽水。髮gel公司之後又喺Facebook專頁出post，推出30g輕便裝，但網友都嫌唔夠喉，留言話公司抽得太輕手：「鬼鬼祟祟咁抽水，點做Marketing」、「我覺得你哋應該係機場派呀」、「我識馬議員，有得免費送嗎？唔得就叫你經理出嚟覆我。」

為一支gel撻朵，你以為係貴嘢？《壹》仔發現，其實呢支gel只係賣$39.9！上星期四馬逢國喺立法會解釋事件嗰陣，都有帶住呢支gel，上面仲貼上誠哥旗下某超市嘅貼紙。《壹》仔喺相關超市望過，發現有分店出售嘅呢款gel，有附送30g輕便裝！

如果間公司早啲出輕便裝優惠，馬逢國咪唔使隨身帶住支200g嘅gel去機場囉。咁小事就要撻朵兇機場人員，仲搞到自己俾人抽足幾日水，何必呢？

撰文：巫不言

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...