【搵銀秘笈公開】開舖儲齊五元素 風火水電煤

人條命，要睇金、木、水、火、土。舖嘅運，要睇風、火、水、電、煤。

商舖有商機就係好舖。要做到生意，就好睇你間舖嘅五大配套：「風、火、水、電、煤」啦。 配套齊嘅，自然容易旺丁旺財，有運行。今集先同你講頭三個。

(1) 風，就係指舖嘅通風設施。根據《公眾衞生及市政條例》，如果你間舖無窗口、無通風位就唔可以出牌合法坐人做食肆、教育、老人院等。通風可以係天然嘅涼風或者係裝部冷氣機。 天然嘅就係指舖入面無遮擋嘅窗口或通風口的總面積，相等於總樓面面積嘅起碼十分之一。 間舖500呎的話，就起碼有50呎面積嘅窗口或通風口。

(2) 火，就係指消防走火。如果間舖係喺地庫或者樓上，你想申請做餐廳 (1) 就必須要有兩條嘅逃生樓梯先至可以出到牌。(2) 如果你想坐超過30人，你就必須要有兩個逃生出口，而兩個出口唔可以太近，所以點解好多時食肆要有前後門啦。(3) 走火逃生路線嘅闊度唔可以少過1.05米，個門口亦都唔可以窄過0.75米。(4)所有逃生路線嘅路線淨高度唔可以低過2米， 如果得單一方向跑向逃生出口 ，該出口亦都唔可以遠過18米先走得甩。係唔係好煩呢！

(3) 水，就係指來去水。唔好搞錯，來去水係兩樣嘢嚟㗎。來水易攞，去水就難得多。因為來水，你只要喺間舖附近有一個大廈供水位，得到大廈管理處同意，再向水務署申請獨立水錶，再搵個持牌水喉匠施工就可以。

去水方面，你間舖必須向渠務署申請接駁到雨水或者污水渠，先至能夠去到水，所以分分鐘要經路政署批准掘地。另外，環保署當然唔會畀你話排水就排水。只有雨水或者係未受污染嘅水先至可以排入雨水渠。但經過得你間舖嘅，道理上就變成廢水啦。如果係食肆嘅油脂廢水， 包括洗手、洗碗、洗菜嘅水，都應該經過隔油池或者其他適當處理設施先至可以排入污水渠。去水又要經環保署，又可能要搞到渠務署，又分分鐘要過埋路政署，係煩好多㗎。 因此以我所知，好多商鋪都係就咁排入雨水渠或者甚至乎排出條街，咁係唔啱㗎！

其他，下集再講。

撰文：李根興

相關連結：
【舖市獵人●舖運下集】揀舖要電流穩定 如有煤氣就更值錢
https://bit.ly/2I260nF

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...