【十大鋪租排行榜】No.1找換店月租最高26萬 得嗰30呎豆腐膶位置喺......

我後面呢間銅鑼灣波斯富街77至83號波斯富大廈地下N舖間找換店，實用面積得嗰126呎，係2013年舖市最高峰嘅時候就以一億七千三百萬成交咗，實用呎價高達137萬。至今依然保持住係全港買賣成交呎價舖王第一位。

租值舖王方面，都係喺銅鑼灣。就係喺我後面呢個景隆街同埋駱克道交界又係找換店呢個位，即係sogo後面，實用面積得嗰30呎，喺2017年5月續租咗十三萬八千蚊。即使比起2014年最高峰嘅時候萬26萬跌咗一半，呎租都要成4600元。亦都係依家香港排第一嘅呎租舖王。

以上呢兩間舖因為好細間，所以呎價特別貴。根據戴德梁行2017年全球十大舖租最昂貴嘅街道，紐約第五大道上段排第一，以實用面積計，平均每月呎租為港幣1950元。香港銅鑼灣曾經第一，依家就排第二，平均每月呎租為1771元。

各行各業嘅租金承受能力正常來講由最貴嘅每呎幾千蚊，至最平嘅每呎幾十蚊，呢個我就叫佢做 rental spectrum 租值光譜。呢個光譜大至分十級：

第一級 (1) 細細間找換店承租能力最高，好似上面咁，以實用面積計，每月幾千蚊呎。但以正常size 的一間舖，鐘錶珠寶可說是同級，都可以承受到每月一二三千蚊呎。即係實用一千呎嘅舖，一二三百萬租。

(2) 國際一線名牌好似Channel、LV等可以承受到五百至千五蚊呎。

(3) 其他次一級品牌零售，賣衫賣褲賣鞋賣襪賣精品等，三百至一千蚊呎。

(4) 再落，就係一啲小食外賣嘅鋪頭，百五至五百蚊呎。

(5) 行業街嘅建材段、花墟、電話零件、街市等，承租能力都好高，大約100至300蚊呎喇。

(6) 其他較高端嘅服務性行業，例如銀行、財務、醫務所、髮廊、醫學美容等，約80至250蚊呎。

(7) 坐低嘅食肆就再低啲，因為需要大間，大約50至200蚊呎好盡咖啦。

(8) 垃雜零售，大約40至120蚊呎。

(9) 其他嘅服務性行業，一般美容院、腳底按摩、補習社、老人院等，約30至80蚊呎啦。

最後第十(10) 就梗係車房、環保回收等，20至40蚊呎啦。

再落？無啦，其他嗰啲就唔應該當佢係鋪，當佢做貨倉好過啦。

買舖想賺錢好簡單。最緊要搵租客方面，就係係呢個租務光譜道一級級咁移上去。 如果你買左間車房，搵到間餐廳來開舖，再變成有品牌嘅零售，再變成一個嘅鐘錶珠寶店， 恭喜你，你肯定賺錢。 但如果到反轉，由間珠寶店變變變變變，變成一間車房，你肯定蝕大本。

買鋪租鋪嘅你，記住呢十大租值光譜級數，搵租客搵業主方向更清晰啦。

撰文：李根興

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...