【一個錫埋男友阿媽嘅女人】李佳芯預習婆媳關係 三人行好識DO

女神Ali李佳芯，同男友陳炳銓拍拖四年。早前本刊發現呢對情侶拍拖放狗，不過唔係二人世界，同行仲有一個媽咪做電燈膽。而呢個唔係Ali媽咪，而係男友陳炳銓阿媽。
曾經喺《BB來了》做寸咀新抱，同辣奶奶鬥一番。現實呢，對住男朋友個阿媽，視后Ali會係咩面口？
Ali同男友陳炳銓呢段戀情，由拍拖初期不被外界睇好，到佢貴為視后，雙方名氣差一截，但無損佢對呢段關係嘅堅定。早已融入陳家嘅佢，對住男友媽咪，行愛屋及烏呢一套。
當日Ali同Auntie有傾有講，憑Auntie嘅笑容，就知道呢個婆媳關係預習，係幾咁啱咀型。能夠同阿仔嘅另一半夾得嚟，相信係好多阿媽嘅心願。
三人行放狗，Auntie好識做，偶爾行開俾個仔同女友二人世界，唔黐身。同樣Ali都好識Do，見伯母故意墮後唔做電燈膽，佢反而怕冷落伯母，轉身撩佢傾下計。關係咁和諧，睇嚟陳炳銓真係煩少好多。
Ali講過，男友陳炳銓俾到佢一份安全感，加上男友嘅價值觀同佢相近，大家都係追求簡單生活，拍拖節目最鍾意一齊行山，覺得簡簡單單已經開心，既健康又慳錢。
貴為視后，又係廣告商寵兒，近年豬籠入水嘅Ali，當日打扮依然好樸素，唔好話對住Auntie，就算對住班街坊狗主，佢都係行親民政策。

「壹起出手，撐新聞自由！」
立即免費訂閱《壹週刊》
登記成為壹會員，睇盡獨家內容，會員活動！
http://bit.ly/NextSubscrition30
【逐步教學】立即登記訂閱《壹週刊》！ 免費無阻睇盡全部精彩內容
http://bit.ly/2UWG7hI 

壹週刊 : https://nextplus.nextmedia.com/
即 like 壹週刊 fb : http://www.facebook.com/nextmagazinef...