【富豪大宅】四叔山頂大宅完工 90歲搬入長壽大屋

香港商家佬發大達之後，唔揾返間House住下又點稱得上富豪呢？好似大劉喺渣 甸山頭唔單止有豪宅仲有好幾間行宮，誠哥60年代已經買入深水灣獨立屋，幾年前拆卸重建後現與長子李澤鉅同住，賭王何鴻燊以及新世界鄭裕彤家族都係淺水灣整番間巨宅。

不過單係恒基主席李兆基，同埋細仔李家誠及女婿都一齊住喺麥當奴道，以四叔前妻英文名命名的Eva Court。此乃四叔發跡之地，年屆九十的四叔今年已準備搬上山頂的「長壽大宅」八年前細仔李家誠以$18.2億投得山頂白加道35號此風水靚地自建大宅，經歷八年時間，三棟以白色為主調的山頂大屋已經差不多完工。

見地盤工人如火如荼地趕工，三幢獨立大宅將由四叔，長子李家傑及幼子李家誠入住，氣勢磅礡有君臨天下之勢，不單能夠俯瞰恒基在中環IFC的總部，其位置仲可以埋白加道十五號政務司司長官邸，怪不得即將做四叔鄰居嘅政務司司長張建宗獲四叔之邀請，上月在國金軒出席其生日lunch，此乃搬上新屋前「睦鄰」之舉！

嗱，四叔大屋入夥，做夥計嘅買乜俾老人家賀一賀佢呢？四叔買入呢塊地皮嘅公司叫 Luxwood Investment Ltd，入面兩名公司股東一間叫Longevity (Nominees) Ltd，另一間叫Wealth (Nominees) Ltd，呢兩間公司名反映咗四叔晚年嘅心願，做 夥計醒爬嘅就棒箱壽星公煉奶(Longevity Brand)做賀禮再同老細講自己搵唔到幾多，小小心意！最好唱埋句廣告歌「壽星公，壽星公，你係好公公！」四叔收到咁「重手」嘅禮肯定笑到見牙唔見眼。其實壽星公煉奶創辦人蔡念因都真係長命百歲㗎，2013年在洛杉磯病逝享年101歲。

撰文：宗菁華

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...