【《深宮計》大結局無天理】胡定欣繼續做皇后 真正殺殷瑈嘅人竟然係…

《深宮計》全劇36集大結局，宮中各人作咩孽就結咩果。最估唔到嘅係，竟然仲有殷瑈（謝芷倫飾）戲份，交代返佢嘅死並唔簡單。
陳煒飾演嘅太平公主大勢已去，就算太上皇李旦（李龍基飾）饒佢一命，送佢離宮返去封地，但煒哥最後都係決定上吊自盡。另外，賣主求榮嘅李美慧未得到馬浚偉嘅賞賜已被滅口。
至於個個都買定花生等睇被廢嘅胡定欣，最後竟然殺不得，仲繼續做皇后。事關當年韋后派刺客暗殺馬浚偉，定欣幫佢擋咗一刀，所以馬仔曾許諾定欣背上嘅疤就係免罪符，仲話：「我不亡，你不死。」定欣既殺不得，更被賜一世為后，但就只有「一琴相伴，孤身獨處，冷宮之中度過餘生。」
至於蕭正楠、劉心悠離宮去到荒山野嶺錫錫；馬國明就退隱兼FF黃心穎。

仲有一局四司，謝雪心決定辭官退隱，但不離宮，長守儀光廟靜心修身以贖罪孽。原來當年佢「聽武皇吩咐，將厭勝之術人偶賊贓俾肅明、昭成兩位皇后，自保一命換來一生不安」。
羅霖、張慧儀兩表姊妹離宮開店舖賣手飾金銀，而一直被指飾演楊貴妃嘅麥玲玲，原來只係佢兩個喺生意上嘅對手。
張文慈宮外無人無物，所以決定留宮盡心侍主，更做埋尚宮。
最慘就係康華，一心諗住去搵韋家雄，點知去到先發現韋家雄抵唔住「長途跋涉，病態龍鍾」而死。

最最最令人意想唔到嘅，竟然係最後一刻再次有殷瑈（謝芷倫飾）嘅戲份，原來將殷瑈凌虐致死嘅唔係煒哥，而係馬浚偉，諗落真教人心寒。

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...