【預咗一個仙都無】俄鋁不准買只准沽 孫柏文：簡直是喪權辱國！

獨立股評人孫柏文在本月初制裁俄鋁（00486）消息一出後，大手撈入俄鋁，並揚言俄鋁獲解禁後股價會回升至3元以上。近日孫柏文對俄鋁依然信心十足：「以俄鋁造鋁嘅生產力、效率、成本、市場佔有率等，一旦鬆綁，在現價計，持有資產值博率，超有資產值博率！」不過他亦提醒股民入手的話，一定要有心理準備：「可能停牌，可能倒閉，可能一個仙都無！」

對於今次制裁，孫柏文認為俄鋁十分無辜：「中興通訊今日（4月17日）都被人制裁，斷正賣嗰啲3G及4G機畀北韓同埋伊朗，我話俄鋁做左咩咁差呀？係咪敘利亞有俄羅斯幾個士兵飲幾罐汽水話，『喔，你有份支持俄軍！』我心諗，大佬，佢做鋁，點知鋁用來做咩？都唔關佢地事啦，真系有啲不公義！」

孫柏文擔心美國制裁行動陸續有來。「失驚無神可能係百度抽了程式，可能係阿里巴巴容許佢賣嗰啲翻版貨，可能是騰訊之前抄襲其他遊戲的概念，你點知它怎開？」他認為全民應就美國的制裁行為站在同一陣線：「買一間香港上市嘅公司，俄羅斯嘅公司，咁樣搞法，仲要令中資金融機構話唔畀買只畀沽，其實係搞緊啲咩野呀？簡直係喪權辱國！」

到底孫柏文撈了多少？孫柏文透露，俄鋁佔其四分一投資組合，平均價大約2.7元。當記者欲追問實際買了多少時，他直言：「坐緊艇、坐緊艇呀！」

撰文：財經組
攝錄：財經組

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...