【金山社團】𤠣子揀食睇老細 馬騮王：發哥都冇面俾

立法會時有妙問妙答。三月廿一日，環境局局長黃錦星回應「野豬擾民」的投訴，指漁護署正檢討管理野豬的政策，自去年起已暫停獵殺野豬，改為替牠們注射避孕針，以控制數量。建制派林健鋒不以為然：「如果局長行山時有野豬衝出嚟，撞咗你落山崖點算？」難得大嘥鬼講句公道說話：「行山遇見野豬，只需保持鎮定、保持距離、不要試圖驅趕，就相安無事。」

 

其實林健鋒應該跟蔡慶熊上馬騮山，感受一下與動物相處之道。他是現存六位「餵猴許可證」持有人之一，縱橫花果山三十多年，「馬騮只會襲擊樣衰嗰啲。」「你引佢、得罪佢就可能會襲擊你。即係你行街見到靚女、走去撩佢，佢會兜巴打你，同樣道理。」「有啲人畀嘢佢哋食，馬騮來接佢就驚，縮返隻手。馬騮覺得你玩佢，快手搶過來，一下無情力整損咗。一傳十、十傳百，就話啲馬騮好兇惡。但親眼見過你就會改觀。」

 

蔡慶熊所到之處，馬騮們確是必恭必敬，「兩隻手接，冇禮貎！」乖乖受教。他們本來崇尚自然，愛吃水果、蕃薯；肚餓時麵包也多多益善，唯獨不吃葷，「佢哋會識得俾面，周潤發咪試過囉。佢攞香蕉、我攞麵包，結果馬騮要麵包。點解呢?我識你周潤發，佢唔識你嘛。」

 

現時全港的野生猴子的數目大約二千多隻。雖然近年漁護署有為公猴絶育，花果依然凋零，「政府話要佢哋自己搵食。山上有幾多嘢食吖？一棵樹有幾多生果？一日生到幾多粒?」蔡慶熊每週開倉濟民兩、三次，百幾斤蕃薯轉眼便吃光，「喺山上餵係無妨，但落到下面，影響到民居就唔係幾好。」大圍近年時有猴出沒，爬水渠、潛入屋，快如閃電，「佢呢班係弱者，喺山上搵唔到食，咪去第度囉。」不然就留在山上吃樹葉，吃得嘴唇也發黃。

 

蔡慶熊從事印刷行業。八、九十年代市道好，他月花過萬餵猴，甚至一天來回幾轉，「嗰時有伙記做嘢嘛。」老婆仔女早年陪他上山，「初初覺得好過癮，睇得兩睇就冇興趣啦。」他早已進入半退休狀態，每月仍然花數千元作為馬騮的糧餉，「我又唔食煙、又唔飲酒，啲錢咪當係賭馬仔囉。」


《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...