【工字不出頭】尖啤夢見工廠大火成真 救火後得五十蚊獎金

全國政協前委員劉夢熊最近唔講政治，反而喺網上講佢人生中發過奇特嘅夢。原來佢有「期貨教父」之稱，同佢七十年代喺土瓜灣一間磨光廠工作時發嘅一個夢，以及一場火警有關。

尖啤話游水嚟香港後第二日，就去工廠做雜工，當時日子艱苦，一星期得半日可以休息，但畢竟月薪有成四百元，比起之前五年喺內地「上山下鄉」嘅艱苦日子，已經好得多，仲有錢寄上廣州俾父母，令佢「覺得物有所值」，就以廠為家。

有一晚，佢喺工廠辦公室瞓覺，突然夢見工廠火燭，驚醒後覺得寧可信其有，於是去工廠裡面睇吓，點知真係火燭，有大概一張食飯圓枱咁大範圍著火，佢即刻救火，再通知住樓上嘅老闆。老闆着睡衣雞咁腳咁走落嚟，同佢講：「好彩你個夢救咗我哋，工廠未買保險㗎，俾佢燒起上嚟，真係傾家蕩產！」

尖啤心諗到月底應該有人工加，點知老闆最終只係獎佢五十元，佢覺得立下呢個功勞，都只係得咁嘅回報，領悟到「工字不出頭」嘅道理，決心要出人頭地，後來轉戰金融界打出名堂，仲做埋上市公司主席。

撰文：巫不言

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...