【90年代姊妹花】黎明詩孖何婉盈 11月麥花臣開騷

懷舊潮一浪接一浪，52歲黎明詩跟46歲何婉盈，離開樂壇各自有新發展，相隔二十年，兩人早前被邀上節目唱歌，歌癮大發，更火速落實今年11月在麥花臣球場開騷，志在跟朋友開心齊齊玩。

【節目重遇】
黎明詩相識滿天下，但闊別樂壇多年的黎明詩，跟娛圈人卻少有來往。去年宣布出櫃，無拘無束的她變得愈來愈活躍，早前兩次上無綫唱歌節目《流行經典五十年》後，歌癮大發。適逢在節目重遇何婉盈 ，兩人一拍即合，決定拍住上圓夢，搵地方炮製復出演唱會。

【有番唱歌信心】
淡出樂壇多年，現職金融投資的何婉盈，根本冇想過可以開騷，故黎明詩邀請她時，第一個反應是：「唔係嘛！」
何婉盈說：「佢搵我，我真係問：『唔係嘛，真係㗎！』我需要消化一陣先答應，事關考慮嘅係我現時有正職啦，可否同時安排到時間去全力做呢件事，第二係冇試過開騷，唔知自己能否勝任，畢竟喺呢行冇做咁多年。不過佢搵我開心嘅，因為可以同人夾份一齊做concert，唔係自己一個孭晒。」
她說上《流行經典》唱兩首歌，令她尋回唱歌夢的信心。「我冇諗過出返嚟個反應都唔錯，亦都因為咁先答應開騷，又多咗好多人搵我登台，讓我事隔咁多年可以當freelance咁兼顧。我哋個騷由年中改為年尾，有足夠時間俾我哋排練同度吓搞啲咩花臣。」

【中女舞照跳】
黎明詩說跟何婉盈拍住開騷，兩人自知不是頂級唱家班，故會搞搞新意思，大玩花臣。
「何婉盈心哋好好，我同佢都好鍾意小動物，大家都有養狗，所以見番面之後有好多共同話題。我近排同佢傾緊開騷，大家唔算唱家班，所以到時會跳吓舞，度吓其他花臣。最重要係到時啲朋友喺香港，個個都嚟到睇騷。依家定咗十一月喺麥花臣開騷，應該會好熱鬧。」黎明詩說。

相關新聞:
隱世廚神黎明詩 揸咪揸鑊鏟一樣掂
http://bit.ly/2sj6L7x

壹週Plus : http://nextplus.hk/
即 like 壹週Plus fb : http://www.facebook.com/nextmagazinef...