【喇沙仔唔打工】《造星》仔與亞姐女友 做老闆搞失戀套餐瞓身一搏

名校喇沙書院畢業的，正路前面有條康莊大道，但現今90後或多或少有著這代人的特質：坐不定；張匡佑(Jason)熱愛音樂，本讀副學士的他早因從事音樂行業而輟學，為了一場出show的機會，他去年參加ViuTV舉辦的《全民造星》。不論選秀show還是論人氣，亦於20強止步，贏得名氣的還是美少男姜濤。
Jason的女友賴嘉瑩(Karen)則參選過亞姐，兩人同於決賽止步。入娛樂圈，此路不通，面目仍然模糊。唯獨當日在造星台上與幾位參賽者唱了幾首情歌medley，名為抵抗失戀沖喜套餐，令觀眾深刻。他最近與女友花掉積蓄40多萬，在上環以月租4萬開Café，亦繼續挾著失戀套餐之名拿來做gimmick。
不過，搞gimmick易賺錢難。不時到餐廳炒散的Jason，曾在樓高三層的大型西餐廳工作，熟習了飲食業的運作，「個到有七十多張枱，不停出菜，我會觀察水吧運作，其實都係參考唔同人嘅工作模式，有機會就自己實踐。」但到真正落手開餐廳，才知萬事起頭難。
他坦言：「有時試咗隻好飲嘅茶葉想入埋，簡簡單單呢個決定其實已經超出預算，所以我哋仲好努力學習緊收支平衡。」餐廳鄰近蘇豪區予人感覺熱鬧，但同業競爭大，新手上路面對的挑戰可不少。樓上舖出牌除看走廊闊度及室內通風系統外，亦有以下要求，「舖頭喺一樓，要上十幾級樓梯先到，第一級樓梯原來要有固定高度。」Jason解釋此高度是用以保障市民安全，確保他們不會仆倒，或上落得比較方便。
店舖樓下正正對著上環著名打卡位，人來人往；但旺丁不一定旺財。「樓下係有好多人影相，但大多係一車車旅行團嚟，例如兩、三點到，可能四、五點就走。」區內競爭大，單是同類餐廳亦有三、四間，要突圍就需搞搞噱頭。「比如係情人節，我哋推出咗單身套餐。而食品我哋會以茶葉為主題，例如用普洱去醃雞翼同埋整豬腩仔。」其另以鐵觀音及大紅袍等茶葉作水果茶等凍飲；二人因此走上內地尋求穩定的茶葉批發商。「我去問香港舖頭時，批發會直接回應有咩供應，就算係當面試茶都係直接傾公事。反之內地人好重視關係，會同你傾好多唔關茶嘅事，例如香港有咩好玩咁。」內地文化不同，Jason笑指跟內地批發商聊了一整天，才真正達成合作，其更分享：「佢哋唔係睇你幾多歲，真係睇你傾計時對茶認唔認識，真係要足準備，咁都無咁易被呃。」
Café於試業期間得到不少朋友前來支持，反應不俗；但畢竟位於樓上舖，要吸引路人眼球、擁有這區客群就必須落地宣傳，Jason亦已制定對策：「離不開要搞試飲試食，推優惠同派傳單令人先認識我哋。」想做的事有很多，但手只得兩對；餐廳目前只有Jason負責水吧，Karen主守廚房，總不能天天做足兩更，因而要在午市及晚市間作取捨。「有好多人都話中上環有好多上班族，會驚訝我哋點解唔做午餐；但我哋菜式都係即叫即整，未必適合只得一個鐘食飯嘅客。」
二人認為此區節奏能容納下午3時至半夜12時的營運時間，Jason解釋：「附近有幾間舖都係下午4點先開門，我就很好奇點解可以做到咁晏，原來佢哋廚房好夜先收爐，以及附近有好多飲完酒嘅人上嚟食嘢。」除了堂食，他亦留意到這一帶的外賣旺場時間有所不同，「試業時有做外賣，發現多單嘅時間都係夜晚11點絕多。」直言屬夜貓一族的他們，決定配合自己生活節奏，主攻下午茶至宵夜時段。
由拍拖不足一年的情侶關係，進而成了生意拍檔，Jason跟Karen可謂日見夜見，「我哋有時都會因為食物嘅份量或調味而有爭執，但其實大家都係想為件事好。」而他倆分工清晰，讀設計出身、曾在廣告公司打了一年工的Karen主力負責店內餐牌及logo設計，問到工作會否影響關係，Jason道：「好多人會諗到分手呢一步，但其實一齊開舖一齊做一件事，係為段關係增添經歷，唔一定係咁負面。咁係信心嘅一種，一段關係無信任，又點會開始？」
撰文：黃綺敏
攝錄：廖健昌
立即下載《壹週刊》Apps，隨時隨地睇盡時政專題、深度偵查、娛樂熱話。按此連結：http://bit.ly/next28app

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...