【空姐入北韓艷遇】金正日畫像下 北韓仔向靚港女示愛

香港人愛旅行，愛去日韓台購物、盡情大吃大喝。自從定位地圖開始普及，自由行更是容易了許多。只要手握一部手機，可說是暢通無阻。但偏偏有些人不愛自由行，愛「跟團」去山旮旯的地方。Katherine是一個普通的八十後，心理學畢業後曾投身空姐。但她應該怎麼想也料不到，今日的她竟然成為帶別人去北韓深度遊的導遊。

北韓不是一個隨便可去的國家，所有遊客都需要跟團遊覽。Katherine對北韓這個國度很感興趣，曾經於2017年參加了一個以平壤馬拉松為主題的深度遊。在平壤跑馬拉松的場景對她而言仍是歷歷在目。「喺入去行呢一個圈嘅時候，其實呢個場坐滿晒北韓平壤嘅市民做觀眾，其實好似奧運選手咁嘅感覺，你走埋去同佢哋揮手，佢哋係好熱情咁樣回應你，跟住會揮動佢哋手上面所有打氣工具，嗰一刻感覺係自信心爆棚！」及後，舉辦深度遊的GLO travel竟然邀請她成為導遊，就這樣，她的人生起了翻天覆地的轉變。

落差

因為大部分的書本或節目描述的大多描寫北韓為一個很負面形象，所以不少團友，包括她自己，第一次去到的時候總會感到很大的落差。「同睇書或者聽好多關於北韓嘅消息，通常都係集中喺一啲負面嘅消息裡面，但去到嘅時候又會開闊好多眼光。我記得團友成日都講，我無諗過嚟北韓嘅酒店會有水壓咁樣沖涼，呢啲都幾得意。」

有看過一些有關北韓的電視節目的讀者，或許都會有一個印象，就是當地人都是冰冷的，都是「被安排」的。雖然不能與當地人時刻保持聯絡，但Katherine則在北韓，與當地導遊一起共事，發展過友誼。「同當地導遊朋友嘅相處好得意，因為我唔可以用WhatsApp同佢哋溝通，但有一次農曆團，本身安排了參觀家庭活動，最後佢話俾個驚喜我，竟然係可以去熟嘅導遊屋企。」以往就算可以參觀平壤居民的家，她也有感像是參觀「示範單位」，但有機會去朋友的家，看到他們牆上貼著自己送贈對方的即影即有相片，已經叫她很感動。

至今，她到北韓工作的時候，仍會嘗試透過該次合作的導遊，相約認識的導遊朋友們於酒店見面聊天。

艷遇

除了認識到朋友外，Katherine竟然還在北韓平壤的人民大學習堂，和當地學外語的男生交流過程中有過「艷遇」。「老師邀請咗一位舉手嘅男同學出嚟，佢出到嚟就攞起個咪，對住幾百個同學就開始問，你結咗婚未？我就答未啦，點知佢繼續問，你有冇男朋友？嗰時我就答佢無啦，其實啲同學已經喺度笑。」最後，不諳中文的男生唯有請老師翻譯：「佢就話佢想問你我呢種男仔你鍾唔鍾意？」然後，Katherine便禮貌派了一張「好人卡」，完結了對話。

談及此事，Katherine仍是覺得好笑，但是問到覺得自己會否有機會和北韓男生交往，她就認為不太可能。

蛻變

至今她已經帶團8次的Katherine說，自己日常從零開始籌辦一團深度遊，都要親自和不同景點的負責人親自接洽。她回想起上年第一次帶團，南北韓政局正值不穩定的時期。家人十分擔心，「佢哋係擔心，如果突然間真係打仗咁點算？不過我諗有時佢地都知自己生咗個點樣嘅女，因為我都好堅持。」

這個職業，叫她在個人上亦有所成長。因為計畫行程中，她常為了讓參加旅遊團的人有機會去到最多的景點，而與當地人爭執。「對好多人嚟講，可能一生人就係去一次北韓，你無咗一個機會就係無咗一個機會。有時真係合作得唔高興，真係會鬧交，但係有時鬧交過程完咗之後，又會互相安慰番大家，『辛苦喇，都明嘅，都攰嘅』。」

撰文：黃心悅
攝影：王晴

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...