《美女廚房》新不如舊負評如潮：主持一味坐定定等食唔識搞氣氛

由阿Bob、蕭正楠、張振朗擔任主持的最新一輯《美女廚房》，於昨晚6月2日首播。一如所料，網上負評如潮，畢竟有鄭中基、梁漢文、方力申主持的第一、二輯在前，對比之下高下立分。

雖則第一集有農夫做嘉賓，但唔少網民都依然鬧爆個節目唔好笑，指若果唔係有農夫撐住個場，根本睇唔落去，所以話「第二集開始無農夫可以唔使再睇，部電視又要封塵了」，仲話三位新主持「剩係識坐定定等食，根本唔識搞氣氛」。我哋睇一睇返舊時鄭中基三人主持嘅截圖，成個氛圍又真係感覺得出熱烈高漲好多，起碼可以打成一片，睇落都自然啲無咁造作吖嘛。

另外，有網民懷疑今輯啲參賽嘉賓一早知道晒要煮咩菜式，一來係因無現場觀眾，自己人關埋門跟劇本拍根本無人知。二來係就算煮得唔好食，但都可以煮得有板有眼，完全無出現以前嗰啲地獄級聞到都想嘔菜式，就連捉活生生嘅食材啲女嘉賓都無咿嘩鬼叫，似係練習過晒。
講起現場觀眾，千萬咪睇少佢哋嘅作用呀，好多都係真性情反映童叟無欺架，以前更有位哥哥仔試過啲地獄級菜式之後，堅係俾白車車咗入深切治療部住咗兩日添。

至於評分部分亦被指講嘢唔夠mean、俾分太鬆手，根本做唔出識有嘅綜藝效果。咁又係呀，今輯《美女廚房》啲評分，好食又10分8分，唔好食又10分8分，生嘅都可以5分合格，然後評語嚟嚟去去都係「睇得出有heart」、「好欣賞所以加你分」。比起以前兩輯，「隔住口罩食都頂唔順」、「真係有屎味架」、「結焦渠蓋龜苓膏」，然後俾負10000分、64分再開方，真係評到一文不值、難食就難食無情講，只能話今輯班主持係大台人，參賽嘉賓又係大台花旦，自己人評自己人就梗係和和氣氣俾晒友情分啦，學志偉話齋：「打和。」

講咗咁多負評之後，點都要讚返下嘅，咪就係估唔到龔嘉欣原來係咁賢妻良母feel，煮起嘢上嚟堅係有水準，巴打們都即刻加晒分俾佢，話好想娶佢返屋企。

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...