【仔大仔世界】魔童跟學校去交流團 袁詠儀：媽媽也要學會放手

袁詠儀同張智霖嘅仔仔魔童由細到大都受到好多關注，事關佢遺傳晒父母嘅優良基因，夠晒靚仔。而家12歲嘅佢，已經大個仔，早排仲自己跟學校去北京交流團，靚靚都話就算有幾唔捨得，都要放手，唔可以困住個仔。兩公婆無強逼魔童上傳統興趣班，魔童愛上踏板，兩公婆都全力支持。雖然佢哋俾好大自由度魔童，但靚靚對佢有個要求，就係想佢講多啲中文。睇返平時佢同老豆開Live講親都係英文，同阿媽出街無得避啦掛？
呢日靚靚帶住魔童Shopping，魔童12歲就成個小大人咁啦，踏入青春期唔會再拖住啊媽行。不過肯陪阿媽shopping都係乖仔嚟嘅，兩個入專賣滑雪用品嘅店睇野。見靚靚好忙咁又睇衫又睇褲又睇帽，無野啱嘅魔童就企埋一邊搞吓模型公仔件衫。
雖然魔童個樣夠靚仔，但咁睇落，真係有啲瘦過頭，Chilam都講過嫌佢太瘦唔好睇。假若遲下魔童大個仔，又大隻又靚仔就可以繼任老豆男神之名啦！
立即下載《壹週刊》Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app