俾女僕扯乾 張敬軒大嗌：「俾我抖吓得唔得！」

近排忙住籌備六月紅館演唱會嘅張敬軒，早前同商台DJ細So去咗日本做直播節目，做嘢還做嘢，點都要忙裏偷閒一下嘅。去到日本，就梗係要去朝聖啦! 於是佢哋就去咗「女僕餐廳」，噚晚軒仔仲將佢呢個「女僕初體驗」擺上Facebook同大家分享𠻹。一入到餐廳，女僕們即刻大嗌：「我哋嘅主人番嚟啦！」軒仔同細So就戰戰兢兢咁行入去。坐低後，女僕們就問佢哋點稱呼，本身細So講咗自己個名，之後又話唔好，軒仔靈機一觸，就話細So叫「農夫，FAMA」，自己就叫「C君」，出嚟玩唔用真名是常識吧。

order咗嘢飲，女僕立即送上，不過飲之前，佢哋兩個要跟住兩位女僕唸一堆說話，足足講咗成二十秒！究竟係咩玩法？原來係一堆令飲品變得好味嘅「咒語」。話音未落，女僕又捧住嘢食出嚟，軒仔笑住話：「俾我抖吓得唔得，very tired。」不過女僕聽錯，以為軒仔肚餓：「oh, very hungry?」老規矩，食之前又要為食物添加「愛情」，即係令食物變得好食嘅魔法咒語，今次除咗講，仲要跟住女僕做啲好「kawaii」嘅動作，咁又做咗成十秒。做完後，以為有得食，點之餐廳突然熄燈，音樂響起，一眾女僕拎住咪出嚟又唱又跳，嘢食仲未落到肚。表演完畢，突然有人叫軒仔，原來余安安都嚟咗呢間女僕餐廳，軒仔搞笑咁話：「我哋即刻要變男僕呀！ 」余安安好配合咁話：「服侍我啦。」細So仲扮女僕做咗心心手勢。最後，女僕請咗「C君主人」同埋「FAMA主人」出去同佢哋影相，佢哋兩個戴住對貓耳仔喺頭上面，好可愛呀。

離開女僕餐廳，軒仔就即刻鬆咗一口氣，「真係好累，食一餐飯，好似飲咗四餐茶咁樣。你啱啱想飲杯水，佢哋就：『唔好住，chotto ma te（等一等）。』見番太陽嘅感覺真係好，哈哈。」不過細So仲攰緊，「嘩，好攰好攰。」其實唔單止你兩個攰，網民應該都睇到好攰。以為就咁完？好戲在後頭，軒仔話女僕餐廳係幾好玩，但係唔夠勁，仲話要帶細So去間勁啲嘅-「人妻」！究竟軒仔間「人妻」有幾勁？留意下集「驚青搵食團」啦！仲有，今次軒仔喺日本仲買咗啲手信送俾fans，快啲去佢Facebook睇吓啦。

https://www.facebook.com/hinscheungof...

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...