【每日壹爆｜七萬一圍酒席】最豪高爾夫球會主席 榮智健富豪飯堂掟$10萬貼士

最「尊貴」嘅香港高爾夫球會主席，要數前中信泰富主席榮智健（1995-2001)，當時中信泰富乃是紅籌一哥，貴為國家領導人榮毅仁之子，在商場上有「太子健」之稱。佢對高爾夫球運動之「熱愛」，歷屆主席都無得比，此話何來？1993年，太子健一擲500萬英鎊買下英國前首相麥美倫（Harold Macmillan）在英國East Sussex Birch Grove的大屋，當時呢單交易震驚英國媒體，寸太子健嘅私人高爾夫球會，只有一位會員！
呢個莊園官氣十足，麥美倫曾經在大宅招呼美國總統甘迺迪、英國前首相邱吉爾及前法國總統戴高樂也經常在此莊園遊玩。大宅有十四間房，最巴閉係有18個洞嘅私人高爾夫球場，榮智健仲揾嚟有名嘅高爾夫球場則師Donald Steel為他設計球場，但榮智健只以此為渡假屋，包埋個廚帶備鮑參翅肚坐私人飛機去渡假屋，打吓波、獵吓野雞。
不過佢都好識做，並非一人獨享，有時都邀請啲英國慈善機構去享用下呢個私人高爾夫球場。
2008年金融海嘯，中信泰富因為炒燶澳元，榮智健落台，似乎都冇乜心情去英國渡假，2011年已將呢間大屋以2500萬英鎊，賣左畀蘇格蘭富豪James Hay，佢個JMH Group以杜拜為基地，專代理名牌消費品。
太子健雖然喺香港嘅商場變得低調，但仍不減佢嘅「海派」作風，識飲識食嘅佢，鍾錦未仙遊前係海都酒樓大股東，早排佢係「福」字頭嘅富豪飯堂延開三席，宴請一班養和名醫食飯，呢間名牌食肆嘅老細都係席上賓客之一，仲貢獻咗私伙珍藏鮑魚花膠與客共享，聽講每席要七萬銀㗎，不過呢個數字唔驚人，最驚人係太子健簽單找數嘅時候，貼士係＄10萬，睇到個經理眼都突埋，仲問左句：「榮生，有冇寫錯呀？」其實富豪好多時「口中無數心中有數」，俾10萬蚊貼士梗係回饋番老細嘅私伙鮑魚及花膠啦，呢個世界邊有免費午餐呢？

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...