【午夜開壇】殯儀揭秘！自殺死要招魂 奸商挾持魂頭呃生意

午夜節目：【仁鬼殊途】

殯儀達人陳達仁未見過鬼，活生生的Pat Pat鬼就見得多，各行各業都有唔少，唔使扮嘢，肯定你office都有幾隻。《仁鬼殊途》去到第三集，傳說中的Pat Pat鬼終於登場，大家畀啲掌聲佢哋，或者自己。
先說殯儀業，但凡自殺或者死於非命的人，根據道教角度亡魂不知已死，總是流連逝世之處，每天案件重演──傳說就係咁講，聽聽不妨──招魂就是讓他們知道自己走了，好應該離開傷心地，結束痛苦。
傳統上招魂要用山雞，不過唔係陳小春，後來政府禁用山雞，業界改用飼雞，或者乾脆不用，無論如何招魂少不了先人衣服，殯儀師傅又會提供牌位紙，即是神主牌，讓魂頭有個位坐，這個位放在殯儀公司或者道堂、佛堂，待出殯拿去殯儀館化了。
近來不管是否死於自殺或意外，殯儀公司一律建議家屬讓先人坐個位，取其心安理得，陳達仁也認為只要價錢相宜，但做不妨。問題來了，如果家屬未談好生意便讓先人坐位，最後改變主意，決定不幫襯這家公司，先人魂頭卻在人家手上，麻煩便多。
通常一封利是可以解決很多問題，家屬取回牌位、衣服，交給第二家公司辦理，問題卻在這封利是的內涵，萬一對方開天殺價，挾持魂頭逼你將生意交給他，等於傷口上撒鹽，你答應又不忿，不答應又擔心。
所以話，最好事前談好細節，事事清清楚楚，杜絕灰色地帶。係，至親身故，家屬一定傷心欲絕，總希望盡快了結，所作決定難免草率，奸商就是覷準這點出招。後事從來不易辦，多花心神，多問幾句，避免爭拗，悲上加傷。

撰文：陳勝藍

 

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...