住麗港城拒炒樓｜澳至尊上市3年市值3.7億 屋邨仔變主席蔡志輝：生活同以前無分別｜每日封面

健康補充品在本港大行其道，聲稱能增強抵抗能力、抗衰老、對心臟有益，甚有商機。
由港人夫妻檔創辦、以銷售西式營養補充品為主要業務的澳至尊，於2016年在主版上市，最近更邀得天后Sammi鄭秀文做新代言人，並贊助多項慈善運動，包括馬拉松、足球、空手道等，希望建立活力形象。
澳至尊創辦人兼主席蔡志輝接受本刊專訪，坦言創業至今18年，經歷過無數風雨考驗，包括老婆大住肚也要在工展會企足12小時推銷產品，最初五年無糧出心裏好難受等等，但兩公婆互相扶持，患難與共，結果創出一片天，但富貴後依然保持原有生活，十年來都是住麗港城，都是揸日本豐田七人車。
這位貼地氣的上市公司主席，出身藍田舊邨、自少體弱多病，明白到成功得來不易，也沒有甚麼值得誇耀的，「我赤身出於母胎，將來也必赤身歸回。」未來他說要好好運用現在擁有的一切，回饋社會。
44歲蔡志輝（Leslie）的澳至尊辦公室位於觀塘鴻圖道，距離麗港城的家只有十多分鐘路程，辦公室的玻璃窗可以望到昔日長大的藍田邨。家的感覺非常濃烈。
屋邨小子常遭同學欺凌
「我細個住藍田公共屋邨，是四、五十年前興建的舊邨，環境比較缺乏及惡劣，爸爸賺錢好辛苦，朝早七點就去揸車，夜晚七點放工，唞一陣就去工廠或者大排檔加班。咁辛苦，賺的一分一毫都好珍貴。我記得以前房屋署會有人來收租，後面跟住一個穿制服的人，拿住支警棍，不停砰砰砰撞門，大喝收租，我哋因為唔係成日有錢交租，阿媽就叫唔好出聲，唔好比人知我哋係入面，好驚。」
在他眼中，藍田舊邨是一充滿罪惡的地方，「落樓下會被人搶銀包同箍頸，我細個陪阿媽落樓下買餸，都被人箍頸好多次，治安好差，吸毒人士會整停架𨋢喺入面吸毒、小便，搞到好臭。」
他小學讀屋邨樓下的培成小學，但由於生得細粒，經常被人恰，「我小學時候好細粒，所以返學校成日被人欺凌，被人打，高過我的打我蝦我，整爛我啲書丟晒我啲文具，我屋企好窮，幾支筆對我好重要，我無筆盒，筆袋都被人扯爛埋，所以個時我立志，大個要做警察拉晒呢班無惡不作的壞人。」
度蜜月病倒激發創業念頭
中學讀觀塘寧波公學，以為完成中學便投考警隊，不過中七成績合資格升學，過到關，於是去了理工唸市場學，結識了讀紡織及服裝系的何家敏（Carmen），二人一見鍾情，半年後拍拖，何家敏説：「我同佢識於微時，雖然唔同學系，但可以老土啲講，一見鍾情，識咗半年左右就拍拖，跟住各自有自己工作。我畢業後在社福機構工作，佢就教書（蔡志輝曾在新民書院及蒙民偉書院教中文、歷史、文學和宗教）。」「他遲我幾年畢業，因為屋企曾經有困難，辭退學業之後做完嘢再讀書。」蔡志輝爸爸在他讀大學二年級時失業，他身為大仔唯有退學幫補家計，經濟好轉後再去浸大讀中文。何家敏很欣賞他對家人的孝順和愛心，一直默默支持愛護他，二人結婚後去澳洲度蜜月，卻激發他們創業的意念。
蔡志輝説：「當時我同太太結婚之後去澳洲度蜜月，點知在澳洲病咗，在當地睇醫生，後來有人介紹我哋食澳洲蜂膠，食咗之後感覺好好，好快好番復原。」
後來經朋友介紹，便膽粗粗嘗試做澳洲天然有機保健產品的代理，「其實我哋後來做生意時，都搵咗唔同國家的生產商比較樣版，最後揀咗澳洲，其中一樣是澳洲天然環境好，對食品監控嚴格，咁就開始做澳洲產品。」
開業初期，只有夫妻二人，「當時很少人食健康食品，最難就是唔知點將產品推廣，又無人力財力，只有好少錢夠入貨，無錢請員工，最初靠做展銷，去百貨公司敲門推銷產品。」
何家敏最深刻的，是陀住BB參加工展會的那一年，「我好記得啱啱同佢結婚，啱啱創業，我大肚企工展會，當時喺添馬艦，當時有好多妊娠不適，就喺流動廁所度嘔吐，同埋啱啱第一胎，乜都唔識，食流動小販食物，其實好無益，人哋企十個鐘，我同佢企十二個鐘，希望搵多啲生意額。」
只夠出糧俾伙記
蔡志輝也說，這段日子和太太的拗撬也最多，「雖然我哋有共同的信仰，有好多理念想法好相近，拍拖時簡直覺得是天生一對，金童玉女，所有事都完美配合，但係一齊做生意，有啲人話夫妻唔好在同一間公司做，何況兩個都是老闆。如果兩個都打工，算啦聽老闆話啦，大家有時會拗到勢成水火，依家諗番梗係唔值得啦，好多餘。」
最大的困難是資金周轉，「我和太太之前出糧好穩定，按時按日就有錢入戶口，我按時按月出糧俾員工，自己就無錢使，好難受。但睇到愈來愈多人買我哋產品，雖然增長好慢，我們都希望會見到break even，至少唔使蝕錢，賺少少幫補下，我哋只是邁向這個目標，絕對無想過上市，總之唔蝕錢就偷笑。」
跟隨他們18年的資深員工Sammi也體驗到箇中辛酸，說最初五年老闆只夠錢向員工出糧，「頭五年都好艱難，佢哋都無出糧，先出比我哋去維持公司營運，一點都不容易，確實好辛苦。」Sammi笑說最初連洗廁所都做埋，甚麼都要理，現在已升為高級營銷經理，回想由低做起到現在，很感謝公司的栽培。
全家總動員落場推銷產品
兩公婆身先士卒落場推銷，大女出世後，也自然成了產品代言人，蔡說：「我哋最初階段，根本無錢請代言人，頭十年都無，最早期我個女就係代言人，我哋做展銷時，我同太太落去推廣，要個女企喺度，派羊奶糖畀人試食。有人就問小朋友你有無食呀，我哋就話佢有㗎，由細食到大，幾精靈。這是唯一免費代言人，此外就是我同太太做代言人啦，話畀人聽我哋好少病或者食藥，因為對保健好注重。」
十年後公司累積了一批客戶，生意開始成形，又請多了人負責在不同地方設立專櫃做推廣，為了加強宣傳，他們於是請了蔡少芬張晉夫婦做代言人，「當時揀咗蔡少芬張晉夫妻檔，他們形象好正面，都是基督徒，同我哋理念好相近，而且他們有家庭形象，又有小朋友，我地希望呢個品牌以家庭的形象開始，把守護健康這個觀念帶入家庭，同Ada和Max合作呢幾年，我哋好開心。」
這些年來澳至尊都是賣澳洲產品，問他未來會否有「日至尊」、「紐至尊」？他笑說：「其實中間十幾年，我當然有接觸其他國家的產品，都有唔同產品可以選擇，之不過我哋做咗咁多年澳洲產品，結識當地唔同的生產商，關係良好，其實依家日本紐西蘭、美國加拿大都有唔同生產商同我哋聯繋，想我哋代理他哋的產品，如果有合適和產品質量高，我地都唔排除呢這可能。」
鄭秀文做代言人建立運動新形象
2016年8月，澳至尊上市，集資額為兩億港元，主要用作品牌發展、拓展及改善銷售網絡及營運，蔡志輝希望建立另一個嶄新形象，於是改用Sammi鄭秀文做代言人，「上市之後我哋想有嶄新的形象，就想到Sammi啦，Ada係影視界，Sammi 主要係唱歌，載歌載舞好energetic，好開心，加上佢好鍾意跑步，每日跑八公里。新的形象都是以運動為主，而且配合埋呢兩三年我哋贊助好多運動項目，有足球隊、空手道、馬拉松等。」
鄭秀文不易請，記者問他如何衡量代言人的效益，他就説：「代言人只是其中一部份宣傳，我哋好難講有個等值，只能說我哋有幾多budget落廣告，去維持建立品牌形象，今時今日可以投放的平台又多咗好多，以前傳統有電視報紙雜誌，而家網上的世界已經好多，我地會好小心投放資源，觸及唔同的target group。」
運動成了澳至尊未來發展一個重要核心，蔡志輝笑説自己細個體弱多病，常吃刺激性食物，非常不健康，後來靠食蜂膠、節制飲食和多做運動才調理好身體，「我去年同太太跑了四場馬拉松，自己就跑六場，在世界各地跑，啱啱先跑完京都馬拉松，四月又會舉行澳至尊慈善跑，搵做運動的藝人參與，仲有專業長跑教練。」公司管理層不少是體育健將，他也帶仔女學空手道參加比賽，全家總動員推動運動文化，早前公司在旺角帝京酒店舉行周年感恩晚會，一家人也出席並上台表演唱歌，與員工打成一片，氣氛熱鬧。
死過翻生 肚皮留疤痕
蔡志輝小時候害過一場大病，不單銘記於心，更銘記於身，「我中五時患咗十二指腸潰瘍，入咗醫院，食咗兩年藥，到考中七因為無戒口又食好多刺激食物，又穿多次，今次係胃潰瘍，仲開咗刀，留下疤疤。」
「我仲記得胃潰瘍個日穿校服入醫院，痛幾個鐘都未見到醫生，等到見醫生，就只係開止痛藥，但返屋企食咗都止唔到痛，半夜痛到死碌落地，叫白車送入院，醫生話要做手術，我好記得當時我瞓喺病床，望到阿爸問醫生可唔可以唔做，醫生話唔做手術就死，要即刻做。」
「疤痕真的好有用，每次我沖涼都望住，提醒自己以後唔好亂食嘢，要好好對待自己個胃，由個時開始，無人迫我，我自己戒口，唔飲汽水咖啡奶茶，食物一樣，刺激性食物唔食，覺得係萬惡。」
他的健康法則是只吃七成飽，即使山珍海錯放在眼前，也不動搖，因為少時的經歷實在太深刻，「信念真的可以改變一個人的行為！其實，人唔使食咁飽，當我習慣咗食七至八成飽之後，發覺會特別舒服，而且去到下一餐前，會有好正常的肚餓，開始叫你食嘢，以前lunch食到好飽，到七、八點都未肚餓，日日係咁好唔健康。」
「其實健康formula好簡單，食有定時，睡眠充足，然後早起吸收新鮮空氣，吸收陽光，但我哋偏偏朝早晏食或唔食，空肚，中午食好多，夜晚夜食又夜瞓，第二朝又唔早起身曬太陽，惡性循環，健康只會距離你愈來愈遠。」
錫身的他，在金錢方面的管理也屬穩陣派，不做高風險投資，買磚頭都是自用，「我係比較踏實，寧願把錢放在公司營運，增聘多啲人手去拓展業務。股票投資幾乎都是藍籌股，純粹收息。買房地產基本上自用，尤其呢五六年，我發覺可以買房地產的時候，先發現啲樓原來咁貴，廿年前買就好囉，可以掃好多收租，但而家磚頭真係好高價位，要量力而為，我喺內地都有物業，但都係內地分公司用。」
旺角做輔警的難忘
小時曾立志做警察的蔡志輝，雖然最後當差不成轉做生意，但中間他也做過17年輔警，更曾駐守旺角區，成為他最津津樂道的人生經驗，亦鍛煉他做生意的應變能力，「我記得當時去旺角執勤，特別開心，因為可以接觸唔同案件，我哋係學堂受訓半年，經歷過步操、體能、槍械、自衛術等訓練，又要熟習警務程序、法律等，但你出來行bit面對的情況，可能係學堂無教過你，側邊個師兄可能都係第一次遇到，個考驗係，當你面對困難時，你就要靈活執生，呢樣嘢同做生意時係一樣。」他四年前已退役，現擔任交通安全隊長官及少年警訊旺角區榮譽顧問，同旺角有不解之緣，手機的背景圖片，也是穿輔警制服的威武樣子。
目前公司已有二百多名員工，在包括香港、澳門、新加坡及中國等地設有逾百個銷售專櫃點，雖已身為上司公司主席夫婦，但何家敏坦言物質生活依舊，沒有特別富貴過，「我哋生活同以前係無分別，住的屋一樣，好近公司，亦無搬屋，全部生活條件無變，都係揸日本豐田七人車，架車用咗好多年，接近十年。」
「沒有甚麼富貴的，只是生命富貴咗，經歷好多困難，人變得成熟，同埋感恩，你會好珍惜現在所有的，因為最初係無，富貴在心中，我哋希望回饋社會，好多謝香港呢個自由社會，令兩個毫不起眼的平凡人，可以闖到一片天。」
撰文：黎明輝
攝影：鄭樹清、梁正平
立即下載《壹週刊》Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...