【不是暴動】守護下一代 媽媽企硬： 唔好郁我啲細路！

6月12日，警察施放的150枚催淚彈、20多枚布袋彈及橡膠子彈震碎了香港人的心；林鄭月娥的「母親論」及堅決不撤回《逃犯條例》修訂的態度激起民憤。六千名媽媽及市民於星期五晚到遮打花園參與「香港媽媽反送中集氣大會」，促使政府撤回修例，原本不算寬敞的休憩空間頃刻變成了「媽打花園」。
612當天身處夏愨道「盾牆」前勸說警察收隊的陸錦城（城姐）在事發後首度現身，在集會上批評林鄭月娥是個「不合格的母親」。有參與集會母親表示，「作為媽媽，你唔企出嚟，十年後槍頭指住嘅就係我哋小朋友。」
這群真正「好打得」的媽媽，決定為了下一代站出來，用自己雙手對抗暴政，大聲向政府疾呼：唔好郁我啲細路！
「英勇母親」城姐：唔想呢度變天安門廣場
城姐在警員面前卸下背包和口罩，撕心裂肺地哀求警察「不要開槍」的片段一日之間傳遍全城，不少人擔心城姐當日疑似中彈後的傷勢。城姐憶述，當時警方在毫無預示之下向她近距離噴辣椒水，令她眼睛、氣管非常不適，一度不能開眼。「其實唔驚得咁多，因為你去到嗰個環境係唔得閒諗個驚字。」城姐當時心裡只是想著要保護年輕示威者，「我盡我能力擋到一啲得一啲，擋到一下得一下。」
可惜警察仍是當著她的面向示威者發射催淚彈。「我覺得好無助，好絕望。我盡曬我嘅力量，去講曬我可以講到嘅嘢，做曬我喺嗰個moment可以做到嘅嘢，但係都無效。」城姐只希望，六四事件不要在香港上演，「我唔想呢度變成天安門廣場！」
孩子不解：「點解差人不停開槍？」
鋼琴老師Jacinth有一子一女，分別三歲半及八歲。女兒天天向她追問，「『林鄭月娥撤咗例未？』我話未，『咁點解啲差人係咁不停開槍？』」面對女兒一連串問題，她需要小心翼翼地回答，「警察喺佢哋心目中係正義，係服務市民嘅。但係呢件事我真係好難開口去解釋。佢哋（警察）覺得香港係要通過呢條條例，但係我哋香港人係唔妥協，所以佢就咁做。」
育有一個五歲兒子的社工Fifi手持自製的「Don’t shoot our kids」標語牌，坐在最前排，在人群中格外顯眼。她亦坦言兒子對事件感到非常不解，因為書中的警察叔叔是「會幫人、你唔識路會帶你返屋企」，但電視機裡的警察卻在用武器襲擊手無寸鐵的學生。
無法接受的「母親論」
在場的媽媽還有一個訴求，就是希望「高材生特首」林鄭月娥下台，皆因她在市民心目中，不論作為特首抑或媽媽都「不合格」。
Jacinth認為林鄭「冇資格做一個阿媽」，「根本阿媽係唔會咁對自己嘅仔女。首先佢唔會用槍射你先啦。」林鄭的「母親論」激起了她的怒火，「我哋香港唔會容許有一個咁嘅人去做行政長官，因為佢唔愛錫我哋香港市民。」
Fifi坦言不能接受林鄭的言論，「用媽媽嚟自居，攞武器對住啲細路然後講一句『為你好』，唔會有人接受囉。」
為下一代盡地一鋪
警察將槍口對準年輕示威者，造成近80人受傷，讓一眾母親都心痛不已。從事零售業的Wing直言自己這幾天邊看新聞邊流眼淚，「覺得香港演變成今日咁樣，真係好慚愧。我哋捍衛唔到呢一班年青人，其實可能係我哋累到佢咁。」有兩名分別八歲及三歲的兒子的她希望為下一代爭取自由的空氣，「用盡最後一口氣，都要去支持呢一班年青人，支持佢哋到底。用盡我哋最後一口氣去抗議呢條條例通過。」
「嗰一班出嚟爭取嘅年輕人，被人用槍、用催淚彈指住、襲擊，但其實佢哋每一個都有好錫佢地嘅爸爸媽媽。佢哋爭取緊免於恐懼嘅自由，而佢哋本身係應得嘅。」說到這裡，Fifi忽然強悍起來：「作為媽媽，你唔企出嚟，十年後槍頭指住嘅就會係我哋小朋友。我寫『Don’t shoot our kids』，就係『你唔好嘗試郁我哋啲細路』。」
撰文：官琳
攝影：廖健昌

「壹起出手，撐新聞自由！」
立即免費訂閱《壹週刊》
登記成為壹會員，睇盡獨家內容，會員活動！
http://bit.ly/NextSubscrition30
【逐步教學】立即登記訂閱《壹週刊》！ 免費無阻睇盡全部精彩內容
http://bit.ly/2UWG7hI 

壹週刊 : https://nextplus.nextmedia.com/
即 like 壹週刊 fb : http://www.facebook.com/nextmagazinef...