Likes
9
per views
1.8%
Dislikes
0
per views
0%
面包天生全失明，但無阻他看世界。他的facebook專頁「面包冇眼睇」拍攝攪笑短片，介紹自己的特殊技能，讓一般人了解盲人的生活，「睇唔到係一種缺憾，唔係缺點。睇唔到都可以打破隔膜，我唔會因為睇唔到而唔同其他人接觸㗎嘛。」 為了與世界接軌，加上天生好奇八卦，他自少就愛吸收不同資訊。體育項目由足球、網球、到桌球、拳擊，如數家珍：「我嗰個年代，最鍾意聽泰臣對荷里菲特。荷里菲特好犀利，佢會跳來跳去，你好難打中，唔係泰臣都唔使咬佢耳仔啦。」睇唔到點知拳腳冇眼？「佢跳步、向橫走，評述都會形容。」「以前的士嘅哥哥唔似而家可以睇手機，淨係靠收音機。你唔會話佢揸緊車、睇唔到隻馬又買？都係靠聽，同我嘅理解一樣。所以咪吸收咗呢啲知識。」「當然，有啲嘢我係唔得，例如柔軟體操，我好難想像佢個單桿做得幾靚、或者平衡木落地攞到幾多分。動作太細微，我未必諗到。」 至於電影，面包以往多數在家煲碟，「好細個時，阿爸帶我去戲院睇《鹿鼎記》，瞓著咗。」「我比較鍾意睇劇情片、煽情啲嘅戲。周星馳除咗對白好好笑， 其實係佢個樣加埋造型，你先覺得好笑。淨係講對白，不如做廣播劇。」雖然「廣播劇」他也多多益善，「『冚家剷泥來種樹，汝家池塘多膠魚』，坦白講，睇一次係背唔到嘅。」至於《唐伯虎點秋香》之中，周星馳怎樣用阿叻的肉身作畫、以子孫根雕蟲，就不得要領，「因為冇口述影像嘛。」 香港盲人輔導會0九年引入「口述影像」，在電影沒有對白時，由旁白描述畫面，「例如，原來吳鎮宇呢一刻好絕望咁，點一枝煙，望住隻船由碼頭慢慢咁離開。將個意境擺喺腦裡面，令我更加了解呢套電影。」盲人輔導會先要跟電影公司接洽，揀選較大眾化的電影、編寫口述影像劇本，再預先錄製口述聲道、或在播放現場由專人配音，工序繁複。至今為十六套電影製作了口述影像聲道。 UA院線自去年起，在青衣和銅鑼灣的影院設有口述影像服務。視障人士免費借用「口述影像接收器」，就可以收聽口述影像，「去戲院睇戲係一種接納。唔好要視障人士自己lurn碟啦。你可以同朋友一齊出街，大家睇埋同一齣戲，幾開心。」面包去年入戲院看了《翠絲》和《逆流大叔》。但由於片源有限，暫時都未有機會再幫襯。 網絡年代，「睇咗當去咗」變成常態，視障人士又可否「聽咗當去咗」？「我自己係車路士迷，我都好想有一日去史丹福球場，睇車路士喺主場贏波，嗰種震撼係我想像唔到。克里姆林宮嘅森嚴，其實係感覺嚟嘅，好得意。如果你有手有腳、四肢健全、頭腦唔係最簡單嗰種人，我覺得應該多走、多睇、多啲觀察，唔好喺屋企睇就當係去咗囉。」 相關新聞 【心不盲】看透劉華鷹鼻 城城偏矮 盲人面包:批鬥關愛座好無謂 https://bit.ly/2TU8H2R 記者: 蔡慧敏 攝影: 胡智堅 《壹週刊》28周年，無懼風波，堅持敢言，壹直企硬。 2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK 壹週刊 : http://nextplus.hk/ 即 like 壹週刊 fb : http://www.facebook.com/nextmagazinef...
More