【劏出個未來】劏天台都玩埋？呎價唔使1000蚊就有800呎 邊個諗到咁醒目？

商場劏細、工廈都劏細，以為劏無可劏？非也！目前連天台都有得劏！嫌「劏天台」太Cheap？轉個字眼叫「天台農莊」就夠晒文青！呎價唔使1000蚊就有800呎，究竟邊個咁醒目諗得出呢？
翻查資料，將天台劏細拆售嘅，係近年積極拓展工廈劏房的「LOFTER GROUP」樂聲集團。由其公司網頁反映，天台下一層的十九樓也由他們持有，分間出38個工廈劏房，網頁標示已全數租出。
行上一層嘅天台，就命名為「LOFTER ORIGIN GARDEN」。平面圖所見，分間出十個位，以「A1-A6」及「B1-B6」排序，中間位就是水缸及電錶房，網頁也標示全數租出。
宣傳單張上係如此形容：「天台農夫、人人有機、再生電源、賺盡商機」，意思鼓勵買家購入作「天台農莊」之用，但實情並無連同水耕用具發售，下手買家要自行添置。買家只是買到一幅「吉地」。
本刊記者實地視察，搭電梯來到頂層，推開防火門走上一層，就來到這個天台。現場所見，跟代理傳來相片分別不大，地下放置了一些儲物櫃。
代理稱，除咗做天台農莊之外，業主都可以做PARTY ROOM，總之玩法任你。不過測量師認為，下手買家要衡量日後轉手的風險外，若打算用來經營生意，也要看有無違法地契或者大廈公契，當中做PARTY ROOM就肯定唔得。
咁「劏天台」又做唔做到按揭先？業內人士指，如果沒有完整樓契、或者天台，都最好預備足夠現金先，因為銀行都未必受理。