【咪懶friend喎】特首選戰交過手 奶媽認得教協選委好威威？

上星期六教協舉行四十五週年酒會，林鄭破天荒應邀出席，成為主權移交後第一個獲邀主禮教協會慶嘅特首。奶媽去年一上任，就增撥五十億教育經費，同年十月，教育局長楊潤雄又史無前例到訪教協，積極同教協修補關係，今次林鄭獲邀出席，都算係禮尚往來。

佢最初致辭時懶有矜持咁話，應邀出席係理所當然嘅事務交往，不過之後都難掩風騷，一臉得戚咁話上年特首選戰嗰陣，就見過大會司儀，似乎對自己力爭「大和解」小有成果相當滿意。

其實司儀同林鄭，的確喺舊年特首選戰中碰過頭，而司儀就係身兼教協出版部副主任嘅中學教師李家宏。一六年教協團隊全取教育界選委三十席，佢係其中一人。二人首次交手，應該就係上年二月初奶媽同教育界選委閉門會面嘅時候。

李Sir舊年接受《教協報》訪問時透露，自己先後喺商台參與製作《風波裡的茶杯》，同去過綠色和平等機構從事媒體工作，之後先成為中學教師。可能因為有傳媒底，所以近年教協唔少活動都會搵李Sir幫手，甚至搵佢做司儀。

不過就算奶媽乘機扮friend都好，教協會長馮偉華致辭嗰陣，雖然禮貌上都多謝佢出席，但照喺佢面前講要繼續爭取民主政制、平反六四等，一樣唔俾面！

撰文：巫不言

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...