【只差一點點】撐民協九西街坊「誤投」鄭泳舜 因姚松炎輸在起跑線？

姚松炎出戰九西補選意外墮馬，唔少民主派支持者都揼晒心口，有人全力搵「戰犯」，亦都有人做賽後檢討。民協深水埗區議員何啟明，上星期喺網台D100節目度憶述返當日戰況，話朝早去咗唔同地方幫姚松炎拉票，但發覺唔對路，於是返去自己所屬嘅南昌東選區拉票。

雖然何啟明出盡全力，令姚松炎喺該區嘅得票多過鄭泳舜二百五十票，但原來都有支持民協嘅街坊疑似「中伏」，投俾對家。何啟明話洗樓期間，嗰位街坊話自己唔識1號姚松炎喺乜水，走咗去投2號！

何啟明當堂嚇一跳，但之後檢討賽果，相信鄭泳舜團隊都有落一番功夫拉票，例如係咁打電話同拍門，又同街坊食過盆菜等等。

其實民建聯早喺舊年已經開始幫鄭泳舜宣傳，相比之下，姚松炎喺入閘後先正式展開選舉工程，得番三個星期，難免蝕底。何啟明又話，長者、基層選民未必好在意DQ、宣誓加料等事件，甚至根本唔知發生過呢啲事。佢舉例話姚松炎冇戴彩帶等選民認住佢，行入茶樓拉票，一班茶客都冇反應，直到助選團介紹姚教授，大家先好似馬浚偉咁：如夢初醒。

何啟明咁講，唔係要踩姚松炎嘅競選工程做得好差，佢覺得去到換屆選舉，以比例代表制分勝負，透過社交平台、手寫banner、踩單車等方式宣傳其實好煞食，但好似今次補選咁單對單，就未必人人都buy。如果劉小麗一席被DQ，九西就要再進行補選，民主派唔諗定對策，到時都唔知點同保皇黨撼過啦。

撰文：巫不言《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...