【14歲大仔英國寄宿】11歲女兒不再黏自己 森美：嗰種痛，講起個心好酸

森美同陳雅嫻結婚十幾年，眨吓眼，大仔曦樂已十四歲，細女曦童亦都十一歲！舊年，佢仲將大仔送咗去英國讀寄宿學校。「我俾佢去英國讀書都係呢個原因，佢都差唔多青春期，已經無乜嘢同我講，同我細個去寄宿差唔多時間，所以都覺得好啱佢成長嘅過程，會話俾佢聽我嘅痛苦，因為去外國讀書真係貴，我唔係好富有，希望佢明白，用番呢個方法等佢生性。」

阿爸多數錫女多啲，話晒阿女係前世情人，唔知森美又係唔係呢？「梗係啦，啲人成日話女係前世情人，我曾經寫過一篇文章，話仔係前世好友，每個阿爸都希望同個仔好似朋友一樣friend，一齊傾到偈，我小時候都渴望同爸爸一齊飲杯啤酒、一齊睇波、一齊傾吓偈，嗰種就係前世好友。女係前世情人，係由細個直到佢青春期，而仔係前世好友，係青春期之後，兩個係擔當唔同角色。」咁曦童又係唔係好鍾意癡住爸爸呢？「女仔去到青春期，天性就係唔鍾意爸爸，覺得爸爸老土。我好大隻嘅時候，喺屋企有時除咗件衫，佢會話你唔好成日除衫，著番件衫啦！有時學校遊船河，佢淨係叫媽咪去，我話點解你唔叫我去，佢話費事我又除衫，唔俾我去，我話除衫無問題吖，我咁fit，佢話就係唔鍾意你除衫！呢啲就係女仔得意嘅地方，佢青春期開始怕醜，見到爸爸除咗上身衫覺得唔鍾意。早幾年佢細個嘅時候，一放學返嚟就會衝埋嚟攬住叫我，而家返嚟叫完我就走咗去，我叫佢攬住，佢個身唔會掂到你嘅，淨係兩隻手黐住，個身就挨後嘅。」

聽得出森美好錫個女，而家個女大喇，好少嗲佢，佢曾經因為咁而好唔開心。「當然好失落，我寫咗篇文章係講前世情人同我分手嘅最後一日，分手日係幾時我仲好想記得番，究竟邊一日係佢同我嘅最後擁抱，邊一日係佢仲肯黐住我，塊面全身好似樹熊咁攬住我，我好掛住嗰一日，但嗰日係幾時我已經唔記得咗，眨吓眼佢已經唔再攬我，嗰種痛，而家講番我個心都好酸，我諗好多爸爸到個女開始大嘅都感覺到。」

撰文：海　山

攝影：黃志明

錄影：葉志明

髮型：Vince @ IL Colpo

場地提供：美樂照相館

【未夠30已結婚】同太太感情怎樣？ 森美：少啲做嘢係好啲嘅
http://bit.ly/2Fnvnhn

【最美的時光】同爸爸一樣怕老婆 森美：初中係我人生最快樂嘅時間
http://bit.ly/2FkrLkm

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...