【殘疾食色性】寫鹹故推動殘疾性權 輪椅女：睇戲片和性玩具都冇私人空間

「性交轉運」看似離奇，實情合乎人性。香港人性生活的滿足度一向低得可憐，久罕逢甘露，就算未能趨吉避凶，至少能改善生活質素。游家敏(Carmen)先天患有脊髓性肌肉萎縮症(SMA)，身體狀況與活動能力隨着年齡每況愈下。性與她的距離很遠？她偏要創作「殘疾甜故」，打算在網上論壇公諸同好。但版主劈頭就問：「你係咪社工嚟㗎？」「點解咁問？」「殘疾人士呢啲......都係好正氣、做啲唔知咩共融嘅嘢。」

 

被拒絶，是因為甜故不夠鹹？「應該唔係，反而係因為殘疾。」甜故本應百無禁忌，人妻、孕婦、人獸大被同眠，何以把傷殘人士拒諸床外？「我覺得好痛心。點解殘疾一定係講啲正能量呀、鼓舞人心呀、化悲憤為力量呀，N咁多個口號式嘅topic？去返啲咁基本、食色性也嘅嘢，佢就覺得我係潛藏嘅社工，想攪共融？」

 

「一講殘疾，大家就轉台，連版主都轉台。所以我更加投入，想攪殘疾性權。」朋友笑她「把殘疾整污糟」，「我覺得我係。我唔想殘疾人士擺喺神台度，唔需要再俾光環佢哋。我想如實咁搣甩個框架，我哋唔需要偶像包袱。

講起光環，游家敏本來就是一隻坐輪椅的小白兔：二千年會考放榜，因為成績優異而見報。中大心理學系畢業，現時在理大社工系讀博士。「殘疾性權」是她的論文題目，「好多人俾意見我，話如果你讀博士仲攪性權嘅話，應該冇乜人會接納。不如你揀啲正氣啲嘅嘢做研究。咩叫『正氣』呢？咁基本嘅嘢都唔叫正氣?殘疾係咪淨係做就業、貧窮、福利就夠呢？」「殘疾性權背後的理念同其他福利政策一樣，我哋推動緊『殘疾人士應該有共同權利』，而唔係佢好慘、冇法得到滿足，所以要提供服務俾佢。」

撰文：蔡慧敏
攝影：胡智堅

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...