鍾國斌叫傳媒少啲監察自由黨 劉健儀周梁交流煲劇心得

自由黨噚日搞咗個新春傳媒午宴，黨內老中青三代同傳媒拜吓年。黨魁鍾國斌上台致辭嘅時候，除咗祝大家身體健康，仲好鬼馬咁叫最近睇完《戰雲密報》嘅傳媒朋友，要畀啲心機監察政府，「唔好畀咁多時間監察我哋」。

兩位前立法會議員劉健儀同埋周太周梁淑怡，紅當當登場，好鬼搶鏡。退出政壇都有一段日子嘅佢哋，一坐埋就同大家分享煲劇經。唔講唔知，Miriam話今年新年都冇乜去拜年，留喺屋企嘅時候就用嚟煲劇。

佢話最近煲緊琅琊榜，靜靜哋嘅時候，都會睇四五個鐘呀，佩服佩服。周太亦都大讚琅琊榜係大陸近年最好嘅古裝劇。

Miriam講到美劇Suits（金裝律師）嘅時候，周太立即話Suits已經去到第七季。睇嚟周太本身都係美劇專家喎。周太講到，佢最近煲返大陸早排好hit嗰套《人民的名義》，大讚劇情夠寫實，寫到大陸官場嘅運作咁話。

撰文：巫不言

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...