【八卦陣●求職拆局】嗌高人工答唔出原因 張慧敏怒窒：咁你又寫？

八十後民協深水埗區議員何啟明，幾年前畢業後見工屢戰屢敗，去民協見工仲寸未來老細譚國僑，但最後竟然請咗佢。資深獵頭人張慧敏（Son姐）聽完佢嘅求職經歷，插到阿媽都唔認得。《壹》仔從中整理見工三大忌，等各位求職朋友注意下！

一、唔認真
何啟明見NGO時，俾面試員質疑佢嘅期待薪酬過高，佢就答「咁你想俾幾多唔我啊？」Son姐聽完就覺得何啟明俾人感覺唔認真，仲質疑佢嘅期望薪酬應該係隨便填。「你又要諗下啦，其實係咪真係高呢？」

Son姐指出，求職者去到第二輪面試，其實公司覺得對方已經符合基本條件，如果求職者嘅期望薪酬被指太高，可以解釋基於咩理由或者計算得出相關數字。「街市買餸啊？似唔似羅湖商業城（講價），喂你個袋幾多（錢）啊？」又話面試員其實可以再寸佢一嘢：「咁係咪我開（人工）幾多你都嚟啊？」甚至可以話：「如果你唔係諗住你值嘅，咁你又寫？」

二、唔識包裝
何啟明另一次應徵職安健推廣大使，被問到有咩缺點會影響工作，他就答怕辛苦。Son姐一聽完就爆咗句：「死得啦！」

一聽職安健，都估到可能要落地盤或者唔同公司，推廣相關資訊，Son姐再一次質疑何啟明，唔係有心想要呢份工：「大話你都唔識得作，理由你都唔識得作個冠冕堂皇啲嘅......已經去到罐頭、樣板問題，咁你咪俾個罐頭、樣板答案佢囉！你都唔識，請佢先出奇啦！」

三、奚落未來僱主
到何啟明見民協嗰陣，佢當住譚國僑面話佢六年前參選立法會落敗係「抵輸」，雖然佢有分析敗選原因，不過Son姐都覺得佢唔使講得咁難聽。

咁譚國僑親自打電話請何啟明，又算唔算特例呢？Son姐認為，譚國僑未必係鍾意何啟明人格，或者覺得對方講嘢有point，而係佢重視某一個範疇或者年齡層嘅睇法：「可能都冇咩人同佢講真話。」

撰文：巫不言

相關連結：
【八卦陣】何啟明見工屢敗屢戰 寸爆譚國僑反獲聘請
http://bit.ly/2IYflNd

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...