【回頭看本土派】多撐激進少講傳統文化 前學民仔：有邊個會睇粵劇？

一二年可謂特別的一年。反國教、反水貨客、反新界東北計劃等社運湧現，此後數年，香港人慘如阿寶，想抖下都唔得。公民社會節節敗退、港中矛盾升溫，令部份關心社會的新一代唾棄泛民，造就了本土派的出現。

隨著多名參加立法會選舉、以至當選成為議員的本土派中人被DQ後，這股新勢力彷彿離開了公眾視野，成為社會和政治運動的過客。

在認同本土派理念、用鏡頭紀錄社運時刻的九十後攝影師眼中，本土派又是甚麼？

曾加入學民思潮、一二年反國教時成為三名絕食學生之一的凱撒，同年創辦網絡平台「90後社會紀實」。這網站初期不過是他分享個人攝影作品的小天地，有社區隨影，亦有六四、七一等社運「春秋二祭」，和大小社運現場的紀錄。

一二年萬人包圍尖沙咀D&G分店門外拍照事件，和一三年一月在旺角東港鐵站外的「光復行動」，令凱撒的世界多了「本土派」三字。

他認為本土派在選舉過後，凝聚力趨於渙散。「激進嘅嘢已經做晒，磚頭都出埋，但結果民氣散晒，凝聚力冇咗，冇一個好solid嘅議題去繼續打。」他進一步指，本土派中支持「激進」的大有人在，但認真研究「本土」的很少。

「真係要講返啲好文化、好在地嘅議題，係需要論述同核心思維。」

「有好多人話要爭取普選，佢哋有個共同嘅公因數，都係叫『普選』。但係何謂『本土』呢？好多人嘅字典（定義）都唔同。」

兩年前，凱撒訪問過不少粵劇演員，但他發現不少老師傅沒有傳承傳統文化的強烈自覺。他們在粵劇界打滾，其實不過為三餐。「有啲師傅直頭唔想有新人入行，因為覺得呢行搵唔到食。」

三年半前，他曾拍攝在觀塘康寧道舉行的香港潮人盂蘭勝會，和主辦單位交流下發現，在香港做神功戲的，幾乎都不是香港人：「全部都喺大陸嚟，喺湖北請人返嚟⋯⋯要住戲棚喎，日日唱十幾廿個鐘。」本地幾無新血加入，無他，因為辛苦。

「本土文化」包含甚麼？除了日常生活能繼續用「母語」廣東話交流、簡體字不會取代正體字、過年時可以吃兩串魚蛋、沒有大媽、沒有水貨、等等等等，「本土」還有太多事物，有待認同它的人發現它。

「而家啲人寧願去睇3D電影，都唔會睇傳統嘅劇。好多話撐本土嘅人，好少去了解本土文化嘅運作。」

至於受凱撒招攬加入「90後社會紀實」的Daniel，小時候曾和爸爸參與六四燭光晚會、七一遊行會到現場拍照的他，眼見梁振英時代的倒行逆施，認為泛民沒有能力為香港人對抗強權，「泛民雖然有去拉布，但佢哋嘅拉布都係點到即止，」於是將目光轉向本土派。

政治氣氛愈收愈緊，本土派面臨退潮，未來又該如何走下去？凱撒聽了這問題，低聲「嘩」了一下，隨即道：「唔識答。識答我就唔使坐喺度。」

Daniel就樂觀得多。「盡可能正常地生活，同唔好放棄自己嘅人生。」為工作、為生活，人生已經如此的艱難，政治氣候轉差更是額外的心裡負擔。既然如此，暫時離開前線，回到日常生活，也不是壞事。

「如果冇嘢做到，然後你就本pea，時機嚟到嘅話，如果你嗰時喺個廢人，你咩都做唔到。」

「專心喺自己嘅工作上面，其實就係本身對社會最大嘅貢獻，亦都係每個人所能夠做到嘅嘢。」

撰文：鄭語霆
攝影：王晴

相關連結：
【相展還原旺角黑夜】打到飛起vs太平掃街 九十後嘆騷亂記憶變潮濕
http://bit.ly/2kYkaLL


《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...