【迷雲黨黨羽點評】從未與王喜嗌過交 被鄧健泓稱呼Honey 陳志雲：可想而知佢有冇腦｜每日封面

蓋：我睇過你嘅訪問，你話自己好愛TVB，有幾愛？
陳：梗係好愛啦！
蓋：你會帶領住某啲藝人，例如王喜先生。
陳：我無帶領過佢，邊個帶領到王喜吖。
蓋：鄧建泓先生啦、崔建邦先生啦。
陳：做咩稱呼先生，嗰個係你嘅舊愛嚟㗎。
蓋：大家都會標籤佢哋做志雲黨。
陳：迷雲黨。
蓋：雖然唔係直接話緊你，但係其實呢三個字都有你個字，你介唔介意呢？
陳：我唔介意，正如我所講，我唔覺得好多人，或者觀眾、讀者會認真去睇呢件事，局中人，例如鄧健泓或者會好介意。
蓋：我無問過佢。
陳：咁你而家問吓佢啦，佢而家嘅婚姻好美滿幸福，佢嘅太太Sukie亦都唔會介意，佢好信任。其實我而家好怕同佢哋食飯，纏綿到呢，使唔使咁纏綿呀？我當然唔介意，只係一個標籤，追蹤源頭，係因為我喺TVB有個blog，呢個名係其中一位觀眾起嘅，我覺得幾得意，同記者提過，之後就有呢個標籤，話嗰啲係迷雲黨。不過我覺得唯一唔好嘅，就係對啲自信心無咁強壯，例如鄧健泓嗰類，你知道佢係憂鬱小生，佢就會覺得人哋覺得我好係因為你，先至有呢個機會，永遠都好似憂鬱小生咁樣。點解你哋會鍾意佢嘅呢？點解啲女仔會鍾意憂鬱小生？
蓋：我當時仲細，唔記得咯！
蓋：啲緣份點樣嚟？係咪同王喜最老友？
陳：其實我唔係成日見佢，緣份嘅開始就係商台嘅時候，我唔記得係九二、九三年，嗰時佢係做兼職，本身做緊警察，我仲記得佢主持個節目叫《妖獸都市》嘅其中一晚，佢係講一啲好出位嘅嘢，當時嘅監管機構廣管局接到投訴，我要回覆嗰個投訴，結果嗰次連累商台被罰一萬蚊，都算好多，因為當時商台老闆何佐芝先生覺得唔係錢嘅問題，係覺得因為犯規被人罰就唔滿意，就係喺嗰時開始認識，所以識咗好多年。後來TVB時期，佢又加入TVB。你，你介唔介意我直講？我對佢嘅答覆就係已經拍好晒，老闆已經決定出街，我嘅意思係事完莫諫，件事已經完咗，你唔好再俾任何諫言，已經幫唔到手，跟住佢再嚟一個口訊，係俾佢嘅意見，呢啲就叫做人哋無問你，你仍然要迫人哋睇你意見，各位，如果你哋有咩禁忌同人相處，千祈唔好做呢件事，人哋都無話要，甚至話唔想要，一個好有禮貌嘅方法話事完莫諫，人哋已經做好晒，就唔好畀意見，王喜係一個好好嘅反面教材。重點係，你估佢俾咩意見？佢話我覺得個廣告拍到你老態龍鍾，導演全部用慢鏡，又話你個人好有原則，你一定要加番個鏡頭先至表現到你有原則，例如手機響起，你見到嗰個人唔識嘅就唔聽。我睇完之後，如果唔係咁熟嘅隨時會扯火，你知我最唔鍾意就係人哋話我老態龍鍾，咪即係崩口人忌崩口碗，使唔使坦白到咁吖？縱然我係老態龍鍾。
蓋：你唔係，我一陣真係要講吓呢一點。
陳：你比較仁慈。不過王喜嘅長處亦係咁樣，佢嘅長處就係唔會因為你係佢嘅朋友，因為有啲說話覺得你唔啱聽，佢就唔講，其實我亦都好喜歡朋友係咁樣。
蓋：最近離開咗TVB，有好多嘢都唔知應該點樣做，我都有成日搵佢
陳：佢都唔會畀到好多意見你。
蓋：畀到好多㗎。
陳：唔係呀，佢啲意見唔得㗎，佢係用心俾意見，佢係一個好好嘅聆聽者。
蓋：有好多idea。
陳：但係好多idea都行唔通，唔掂吖嘛。
蓋：咁我都係唔好同佢分享喇，叫佢唔好睇呢個訪問，其實我搵佢，問佢可唔可以幫我搵……
陳：我知道，佢有講個過程畀我知。
蓋：而家喺度講佢是非好似唔係幾好。
陳：係應該講佢是非嘅，好似早排我同佢，同埋Sukie一齊做個訪問，講番好多年前佢喺查小欣節目，形容我係Honey嗰件事，佢都仲係記掛到今日，覺得有啲唔舒服，咁睇唔開嘅人，你仲問佢攞意見？
蓋：對自己同對人哋可能唔一樣。我無乜幾多，而我又好相信嘅朋友去問意見，所以會經常搵佢，做我朋友係一世嘅。
陳：呢方面佢係信得過嘅，但你諗吓，人哋叫佢揀，佢都揀咗Hoeny嚟形容我，可想而知佢有冇腦㗎？呢樣嘢你就唔使問佢，佢仲要話俾我聽，我答得好好呀大哥，我問佢好成點樣，我當時喺內地陪邵先生巡視緊內地教育，喺湖上面，我差啲跌咗落湖。佢講完都算，你咁樣講，但我最頂唔順係跟住佢話，你知唔知我講得幾好，我真係講得好好，聽到呢句我先至真係差啲跌落湖。我心諗唔係嘛，你嘅自醒能力低到咁樣，呢個係心想啫，無講到出口，不過咁多年嚟佢應該有進步。你自己有猶豫咋！
蓋：我唔係成日搵佢㗎，我真係唔敢成日騷擾其他人，始終有另一半，我除非好緊急至會搵佢，不過好快就會講完。
陳：好呀，咁以後唔使搵佢喇。
蓋：你搵我吖，今日多謝晒Stephen哥哥。
陳：唔好客氣。
蓋：祝你青春常駐，身體健康。
陳：你都係，大家咁話，祝你快啲搵到另外一半。
策劃：肥A
攝錄：黃志明、蕭敬漁
蓋世寶髮型及化妝品：波兒（嫁妝）
立即下載《壹週刊》Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
相關新聞：
【唔能夠同其他人一齊生活】60歲人未拍過拖！ 陳志雲：男又無，女又無，無人鍾意過我｜每日封面
http://bit.ly/2Tktb0w
【也許相愛很難…】分手7年再相聚 蓋世寶：佢已經有自己一個家庭 林景弘：記得佢生日，就會諗起佢
http://bit.ly/2TQThMU
【父母內地有廠房】12年離開TVB北上拍劇 42歲林景弘：呢個年齡仲要靠屋企幫手都幾醜
http://bit.ly/2FfY5lG
【蓋世寶訪問戴志偉】藝人收入低 每晚走6場唱歌搵錢 戴志偉：我係唔捱得窮嘅人
http://bit.ly/2NVOIM1
【蓋世寶訪問戴志偉】無綫工作30年劈炮唔撈 轉做地產再做保險 戴志偉：過嘅生活似番一個人
http://bit.ly/2NNoafM
【入行23年由主持做到變二打六】續約要減1/3人工僅得七千 蓋世寶劈炮：真係夠喇！
http://bit.ly/2UUMpuQ

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...