【米王之後搞名校豪宅】哥爾夫球會主席典型權貴明哲保身 波會靠「爛頭卒」發聲

特首林鄭月娥回應土地供應小組之建議收回粉嶺哥爾夫球場，表明不能照單全收；講白啲，都係免得罪權貴啫。事實上香港哥爾夫球會主席，向來都係由社會有「名譽地位」嘅權貴擔任，畢生排隊或者俾過千萬做會員都係為咗彰顯身份同社會地位，又有幾多會員熱愛哥爾夫球呢？
貴為香港高爾夫球會主席嘅呂元祥（Ronald Lu）在收回球場議題上表現得十分明哲保身，甚少蒲頭去捍衛會員權益，波會反而搵阿叻、樓南光及體育記者出身嘅劉家樂出嚟做「爛頭卒」。又係嘅，呂元祥係香港典型富三代，又點同你拋頭露面博俾人鬧咩？
佢阿爺呂明才無人不識，係一代潮州米王兼銀號老闆，字號為呂興合；阿爺呂明才於1957年過身嘅時候已經有260萬遺產。家族喺西環一帶經營貨倉、凍房；最為香港人認識嘅係代理「雙羊」和「金冠」米。呂元祥係呂明才長子嫡孫，在澳洲及美國修讀建築，有自己嘅則樓；公司以往接唔少新鴻基地產嘅生意，事關佢個仔呂慶耀娶咗郭炳江個女郭曉妍，但發生涉嫌網上桃色勒索案後，這段政治婚姻已告終 。
呂元祥老婆楊俊婷間學校仲巴閉，係寶山幼稚園。話說寶山幼稚園係升讀聖公會名校如男拔、女拔、聖保羅男女之階梯，為咗一個學位，無論父母乜官階，身家有幾多，都要攀附呂氏夫婦，所以呂元祥擔任哥爾夫球會主席， 只係錦上添花咋。
呂氏家族在西環仍持有不少收租物業，亦投資不少山頂貴重住宅，呂元祥亦居於南區舂坎角獨立屋，聽講佢都鍾意係屋企揈兩棍高爾夫，唔使吓吓開車去到新界嘅粉嶺哥爾夫球會打波嘅。
撰文：宗菁華