【爆肌身材40年不變】56歲「山狗」林偉懊悔錯過三次上男一：性格害咗自己

大台劇《鐵探》當中，飾演殺死Madam Man個仔嘅「山狗」林偉，雖然只現身五集，但一樣俾網民力讚演技。
當年佢由Top model，做到電視台力捧上位嘅男二，可惜年少時冇好好珍惜。後悔曾經嘅錯失，更加激發林偉要keep好副body同狀態。佢今年已經56歲，副爆肌身材，原來維持咗40年不變，勁呀！
「由中二開始，逢假期或放聖誕假、暑假，都要去哥哥間車房幫手做粗重工作，就係咁好似練拳一樣，中學時期操到骨架會比較橫。」
四十年，Keep住每日操肌一小時，飲食保持清淡。呢份能耐，出於向來貪靚性格。「因為貪靚，所以就唔會俾自己肥，慢慢就變成生活習慣。」林偉說。
當年憑住呢副好身材，成為80至90年代初Top Model。
「當時啲同學都只係賺緊千幾蚊一個月，我有時可以搵到過萬蚊。例如香港時裝節，會預訂我一段時間，當年最多用我嘅係林國輝先生，
八九年曾經跟佢上北京做國慶時裝表演，有一批衫由朱玲玲小姐設計。」
後來參加亞視舉辦模特兒大賽，對手有黃德斌。雖然落敗，但被監製王心慰賞識，第一套劇就做男主角。
「首先拍咗一套亞視劇集《天橋》，當時年紀輕輕，唔係好識得把握機會，覺得拍電視劇好辛苦，要早夜班拍攝，當時係王心慰監製搵我。我試過唔起身開工，激死佢！喺度同佢講聲對唔住，當年因為太辛苦，又唔習慣嗰種工作模式，試過唔願起身開工，後來佢打電話叫我返去，我又唔識反省後悔，拍完一套之後就無再拍，決定都係做番模特兒，因為做模特兒比較自由自在，又唔使記對白、記走位。」
當電影新人，在電影《兄弟》飾演李修賢的弟弟，但不懂把握，表演欠佳，俾導演冼紀然鬧到狗血淋頭，差點要易角。
「其實都要怪自己無好好把握，我本身又比較鍾意自由，一句唔做就離開咗，所以性格係有少少害到自己。嗰時已經錯失兩次機會，好多人都等緊呢個機會，因為係男主角，但就係咁樣流失咗，之後就做番模特兒。」
93年機會再臨，監製王心慰再次起用他，安排在處境劇《餐餐有宋家》當第二男主角，拍住男一「白淨」階段的古天樂。
「直至拍完《餐餐有宋家》之後就離開咗。好多人都問點解我喺最好嘅時候離開，又係無腦嘅決定！當時出現一位改變我命運嘅人，係一位台灣經理人，佢喺台灣有好多大明星都係佢旗下，如孫興同周華健，佢問我有冇興趣嚟台灣發展，可以為我現時嘅人工翻多一兩倍。當年太年輕，無認真去諗，拍咗一兩套劇以為好多人認識，以為自己好有實力，所以決定離開TVB。
當年珍姐都有挽留我，所以都要同珍姐講聲唔好意思。珍姐話如果想離開，不如簽短啲年期，不過我都拒絕咗，又係自己搞成咁樣。」[/c]
[h][/h]
[i]267264[/i]
[c]到台灣發展，他說是人生中最錯誤的選擇。
「嗰段時間台灣流行閩南話，我喺香港拍開警匪動作片，叫我拍閩南話，仲要配音，同埋有一種方式，我唔係好習慣，就係帶住啲香煙同酒周圍去電視台拜訪，同我講嗰啲唔係叫經理，叫長官。有時仲要應酬飲酒，我唔係好習慣，因為以前喺香港都未試過咁樣，所以嗰兩年時間過得好辛苦，心裡常責怪自己，唔應該離開TVB，責怪自己咁蠢，見到當年一啲後輩已經慢慢上位。」林偉重提，依然一臉悔意。
台灣解約後，回港的世界，已經不再屬於他。三次錯失上位，他好自責。
「當然會自責，同埋覺得世界好灰暗，當時應該係二千年至一○年，呢十年雖然期間都有拍攝工作，不過都係啲瑣碎工作，加上拍住朋友搞下生意(曾在九龍城賣大閘蟹)，生活都唔算好艱難，但喺工作上無一種滿足感，呢個最重要。」
現在那管是客串，追回失去的機會，用心演好。
「量少都要重質，因為唔好放棄演出機會，就算得一兩集，唔係好多場戲，都要做好自己本份。」
去年他在背紋上日本名導演黑澤明的《亂》，其中在銀幕出現的四句: 去如電、疾如雷、不動如山、侵掠如火。
「我覺得有啲似自己，不動如山，有啲靜，我唔會大大聲滿場飛，去到邊都係靜靜哋坐喺度，侵略如火；一工作我就會好快手，唔會嚕囌，都有啲似山狗，去如電、疾如雷，佢出場都係咁樣。」
採訪:Sukey Lo
攝錄:黃志明

「壹起出手，撐新聞自由！」
立即免費訂閱《壹週刊》
登記成為壹會員，睇盡獨家內容，會員活動！
http://bit.ly/NextSubscrition30
【逐步教學】立即登記訂閱《壹週刊》！ 免費無阻睇盡全部精彩內容
http://bit.ly/2WYFZvA