【機場直擊】陳家樂陳瀅秘飛東京拍拖 扮等巴士轉搭機鐵返女方香閨

上年，拍咗大台劇集《逆緣》飾演凍齡爺爺嘅陳家樂人氣急升，事業三級跳，點知愛情方面就啱啱相反，同年六月俾拍拖四年幾嘅余香凝狠飛，情傷到爆。
感情嘅嘢，舊嘅唔去，新嘅唔嚟！好似陳家樂咁，唔使半年，就搵到個靚過個ex嘅宅男女神陳瀅做女友。
有讀者爆料，一月三號喺東京機場見到陳家樂同陳瀅孖住等上機，雖然兩個人都戴住冷帽同口罩，但係都好易認得。經「壹仔」明查暗訪後，發現陳家樂同陳瀅喺一月三號齊齊返香港。
「壹仔」當晚喺機場等佢哋，戴住冷帽同黑色口罩拉住喼嘅陳家樂先出閘，左望右望先落地下巴士站扮等巴士，企咗幾分鐘確保無人跟蹤後，再乘升降機上機鐵站，買飛搭機鐵。 等機鐵時，陳家樂警覺性勁高，雙眼望嚟望去，一邊打量等車嘅人，一邊用handSfree講住電話報告狀況，相信對方就係女友陳瀅，呢一刻，佢似乎發現「壹仔」。
一直好想會合番女友嘅佢，上咗機鐵繼續講住電話。為想撇甩「壹仔」，當去到青衣站時，佢突然離開車廂，然後行前咗幾個車廂再上車。去到陳瀅屋企嘅九龍站後，陳家樂見撇甩「壹仔」唔成功，就算只差一步就到女友屋企，都焗住敗走，上的士離開。陳家樂同陳瀅飛去東京，兩人溫馨纏綿咗四日三夜仲未夠，返到香港仲想千方百計合體，明顯係熱戀期。
上年十二月俾途人影到齊齊食壽司，再俾傳媒影到女方揸車，載埋男方返九龍站上蓋屋企，「雙陳戀」曝光後，佢哋曾經夾晒口供咁回應過。陳家樂說:「佢都係義氣仔女嚟嘅，我覺得佢有啲似Michelle，衛詩雅。佢即係都好有雷氣呀，好朋友，而家關係似係兄弟情，突然由兄弟跳去講情侶，就唔似囉！」
而陳瀅就咁答:「佢俾我嘅印象係個好勤力，同埋好捱得嘅演員，呢樣嘢係抵讚同幾欣賞嘅。合拍嘅，拍攝上、工作上，同埋劇組都有講過，話我哋兩個似樣，似兩兄妹。」
咁今次除夕同遊日本甜蜜倒數迎接2019，唔知佢兩個又點拆彈呢？
立即下載《壹週刊》Apps，隨時隨地睇盡時政專題、深度偵查、娛樂熱話！按此連結：http://bit.ly/next28app

攝錄：吳斯金、蕭敬漁、東尼

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...