【做電視台高層】「奇妙」創作總監 王喜做埋浸大亞Sir: 係報應呀!

最近王喜擔任奇妙電視嘅創作總監，除咗keep住有劇拍之外，佢仲撈過界去做老師教書。「我而家就係浸會大學電影學院高級文憑課程Year 2嘅講師，我係王sir。最初都好擔心，你知啦，一個唔係幾乖嘅學生，到有一日要做老師，好明顯就係一個報應。」

原來以前王喜喺讀書嘅時候會食嘢瞓覺、走堂，然後唔交功課，今日要做老師對於佢嚟講係一個最好嘅報應。「你知啦，返工之前都有好多打聽，同埋嗰時浸大啱啱發生咗嗰單師生衝突，同坊間途聽塗說話佢哋會遲到，上堂會瞓覺、食嘢。我會有好多唔同聯想，有幻想，啲學生會唔會第一日返學就問我，你企那一邊？你支唔支持學生？首先嗰日無咁樣，其次就係佢哋好準時，仲要係想去廁所嘅時候會舉手。」雖然只係教他們短短13堂，但王喜依然做足老師本份，仲向他的學生有所承諾︰「我能夠承諾嘅就係，我希望能夠用十三堂，每堂三個鐘，去協助佢哋喺經過呢三十九個鐘頭之後成為一位演員，但我需要佢哋嘅配合同埋協助。」

王喜同時要協助一班學生完成畢業作品，佢寫咗一個以生離死別為主題嘅劇本比學生揀，估唔到好多學生揀之餘，仲個個都比佢個劇本感動到喊。「呢個係我好意料之外，因為我估佢哋都係好細年紀，我無諗過佢哋會對生離死別咁有感觸，當然啦，獅子座嘅我梗係會沾沾自喜，覺得自己寫啲嘢OK。我覺得佢哋真係因為呢個劇本而入到個戲，而令佢哋享受到作為演員一個好珍貴嘅moment，就係遇到一個喜歡嘅角色，喜歡嘅情節，而佢哋都可以同佢熟悉嘅同學作為拍檔，一齊去演呢一個短劇，呢個經驗係對好多演員嚟講係難能可貴，因為大家都知，演員好被動，要得到咩嘢劇本，要睇吓你究竟係一線、五線定係七線，所以令到佢哋喺學做演員嘅過程當中已經有呢個經驗，我覺得好似帶咗俾佢哋一個唔錯嘅回憶。」

現今老師壓力都唔細，王喜雖然只係短期參與，但佢一樣有壓力。「最大嘅壓力就係十三堂，你唔知點樣去為每一堂劃分主題，你要定第一堂教乜、第二堂教乜、第三堂教乜，就算俾你定到主題都好，一堂係三個鐘頭，根本就係一場騷。因為如果你呢場騷做得唔好睇嘅話，佢哋會瞓覺㗎嘛，有冷場㗎嘛，因為我係演員，就算教書都好，都要作為一個表演去做，你要有個起承轉合，要令到學生容易記得，究竟呢一堂想講啲乜，要有恰當教材、道具。」更估唔到嘅係王喜搵埋陳志雲做助教，令成班學生都好驚喜!

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...