千億盈餘派唔派錢？ 專業議政：做好基礎建設先

立法會未開爐，民主派專業議政四位立法會議員郭榮鏗、葉建源、邵家臻、梁繼昌，連同醫學界立法會議員陳沛然，噚日就率先同傳媒朋友拜年。之不過一講到千億盈餘點用嘅時候，佢哋對直接派糖就有啲「睇法」，強調做好福利、醫療同教育嘅長遠規策好似更加重要。

邵家臻一開聲就祝林鄭同政府「福有攸歸」，佢話福利唔係開支，而係投資，叫政府唔需要喺福利上面吝惜，仲話自己「支持」派錢，每個月派三千五百蚊畀六十五歲以上嘅長者，唔使資產審查，明撐全民退保。葉建源就話嚟緊一年喺財政預算，對教育有好多期望，例如改變師生比例等等，唔希望TSA喺新一年再成為香港嘅操練器。

梁繼昌就希望，社會基礎建設做返好啲，唔好揼哂去啲大白象工程，仲愈講愈㷫咁話：「我唔會評論其他政黨有人話派六千蚊，呢個係一個最簡單、最直接，好多市民都可能會拍掌嘅……但作為一個負責任嘅政府，應該畀到一個願景我哋，啲錢要擺喺邊度，咁樣一樣會得到市民嘅掌聲同支持。」

一向係謙謙君子嘅郭榮鏗仲爆咗句話：「如果你覺得，有好多錢、水浸，所以覺得每人派六千蚊，呢個係極之短視，冇遠見嘅一個做法」。

撰文：巫不言

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...