【立會選戰●娥姐駕到】陳玉娥黑超look現身 見到記者扮怕醜？

呢個年頭，估選舉結果仲難過賣大細，有邊個諗到姚松炎會喺九西輸二千幾票。又有邊個估到，前年參選新東只係攞不足五百票嘅娥姐陳玉娥，今次補選竟然攞到一千五百零四票，多咗兩倍，而且佢另一「勁敵」、星期日喺立法會外連續祈禱十二個鐘都唔落區拉票嘅趙佩玉，最終「蒙主眷顧」攞到三千零六十八票，仲多過娥姐成倍先得㗎？

話說娥姐喺凌晨三點左右，身穿紅色羽絨外套殺到會展點票中心。佢一到就問：「中大同學仔呢？」中氣十足，之後戴埋黑超，配合sharp到無倫嘅背影，就好似漆黑中嘅螢火蟲咁，鮮明又出眾。《壹》仔一見到娥姐，就諗住上前同佢傾下計，點知佢突然怕醜豬，話自己同同學仔傾計，跟手就拉住個著白衫女仔行埋一邊，不過個女仔冇耐就行開咗，娥姐最後都係要面對《壹》仔。

投票日本應係候選人最後衝刺拉票嘅日子，不過娥姐就聲稱當日主要係多謝提名佢參選嘅人，但未開票就謝票，早咗啲喎。娥姐就話自己唔著重結果而著重過程，有人提名佢已經好感激咁話。

《壹》仔再問娥姐點評估勝算，佢就話星期日黃昏有兩間傳媒採訪佢，「我講啱咗啦。頭先我睇壁報板，唔知㗎，可能我講啱咗啦。」咁講啱咗咩啫？「我唔想再講。」只能夠話，《壹》仔真係參唔透「玉」音。

撰文：時事組
攝錄：時事組

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...