【神而不棍】風水點樣破迷信 陳偉霆忌水點解大陸爆紅

風水佬呃你十年八年，你唔好信，但風水佬叫你唔好畀人呃，就不妨聽聽。李應聰師傅利用一般人覺得迷信的風水來破除迷信，聽落好似太陽能電筒咁矛盾，其實好容易打爛其他風水佬飯碗，不過都係嗰句，歡迎對號入座，各位師傅請坐。

今集探討方向與運程有沒有關係，風水學上東方屬木，南方屬火，西方屬金，北方屬水，近幾年大家見識過北水南調，身邊想必也有人北上搵水，但如果你八字忌水，又可否北上？

七八年前高登有句「而我不知道陳偉霆是誰」，可見陳生紅得去邊，為人熟識的除了是Angelababy、阿Sa前男友，09年Michael Jackson逝世，陳生開口埋口話對佢幾咁思念，相信連霍金都知道佢係MJ迷。

陳偉霆八字凍過水，亥子丑三會水局，你唔知我噏乜春唔緊要，總之佢條命以水為忌，根據傳統風水學，他北上只有送死，上述兩位女士送佢殯，偏偏後來他在北方大國爆紅，矛盾過太陽能電筒，所以話五行方位對人的運程其實沒有影響，最緊有運行，而所到之處又有機會讓你發揮。

陳生條命以火為用神，所以在2013、2014、2015蛇馬羊猛火三年爆紅，而中國大陸又有舞台讓他發光發熱。2015年更加在廣州開騷向Michael Jackson致敬，原來，佢真係好鍾意MJ。

無運行，被指借死人過橋出位，受盡世人唾罵；有運行，人人信他這番思念幾咁真摯，簡直不能抑止。

 

撰文：陳勝藍


《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...