【生意●鬧市喎】美麗華商場開舖賺得6千蚊 老闆：唔係咁好搵！

皮革手作，令人想到的是工廠教室，發展空間有限。成立八年的Motto Leather，嘗試由最初只租200呎教室，發展到2000呎工作室，去年再衝出工廠，在尖沙咀美麗華商場開設分店，平均每月營業額二十萬，但此分店每月只賺六千大元。兩位八十後創辦人容銳剛(Ivan)及翁婷姿(Gigi)，苦笑道：「唔係想像中咁好搵！」做落去最大原因，純粹因為想：堅持。

「其實以前做教室，賺得仲多，每月可以有三到五萬，但而家規模愈大，添置機器愈多，租金亦愈貴。」美麗華分店由兩間舖組成，一邊是零售，另一邊是教學工作室，兩間舖只隔一條行人道，位處𨋢口位人流頗旺。 Ivan憶述:「最初喺16年時，係K11同朋友分租一個250呎細舖。後來美麗華零售主任對我地有興趣，主動接觸我哋。其實都有其他商場，好似朗豪坊接觸我哋，但當佢哋知道我哋盤數，就知我哋無辨法租到。美麗華租金已相對較平。」

美麗華分店開張後，營業額由工廠教室的十萬，升至平均二十萬元，不過人工租金樣樣錢，扣除後，美麗華分店只有近六千元盈餘。兩位老闆都表示：「唔係想像中咁好搵。」而且皮革市場也有淡旺季，兩人表示經營皮革要「好天斬定落雨柴」。Gigi表示十一月到二月其間，在聖誕及情人節的送禮旺季，收入會比淡季增長達一倍，Ivan指：「有時都係啱啱好夠交租同俾人工，我咃兩位老闆都無人工出，要拉上補下先填到條數。」其次，假期長短也是顧客考慮參加課程的因素，Gigi表示：「長假大家都去旅行，仲點會嚟上堂。」

有見皮革市場在經營上的種種艱難，而且競爭愈趨激烈，兩人亦急急變陣，轉移投放資源使顧客有更佳的服務體驗，Ivan前後就投放了近二十萬更新網址，並受NIKIiD啟發，在上年開發全港首個自選皮革顏色的系統。顧客在網上訂做皮革產品時，網站會提供紙樣，然後顧客根據自身需要選擇顏色，即時呈現成品的效果，「唔洗你有你講，佢有佢講。」記者在美麗華分店，就觀察到學員透過電腦使用該系統訂購皮革銀包的經過。其間無須任何員工招待，只要等待學員完成選項，員工便立即根據紙樣裁剪布料，過程十分鐘便能辦妥，更可以即時安排上堂，整個過程減少了員工負擔，亦能使顧客有更多選擇。Ivan表示有一個清晰的網站很重要，曾因為網站簡陋而流失客人，不過投資在網站的金額至今仍未回本，只是蝕住做。

撰文：陳世鍾
攝錄：廖健昌 關永浩

相關連結：
【生意●專利無用】造皮革用勻3種布料27種色 老闆：淘寶即刻抄
http://bit.ly/2HUttqi
【生意●一兼三職】教師轉行教小班：開心過以前！
http://bit.ly/2F8Lrnd

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...