【咁即係處男】60歲人未拍過拖！ 陳志雲：男又無，女又無，無人鍾意過我｜每日封面

蓋：歡迎今日嘅嘉賓，陳志雲哥哥。
陳：多謝你叫我哥哥，唔係叔叔，蓋世寶姐姐，我細細個就睇你做兒童節目。
蓋：咁多工作經驗，有冇一段時間，你會形容為「我的快樂時代」？
陳：其實我唔係好多經驗㗎咋，蓋世寶妹妹，如果以僱員嚟計，我只係打過三份工，政府、商業電台同埋TVB，只係呢三份工，性質又多數都係傳媒，政府嘅時候就涉獵多啲唔同部門。
蓋：即係你每一段時間都係快樂？
陳：都係快樂，我覺得人最緊要快樂，就算最低落嘅時候，都會喺低落之中尋找快樂。
蓋：你咪會好識得拍拖？
陳：我唔拍拖，無拍過拖。做咩好出奇？你係咪想同我拍拖？
蓋：有嘅，你唔講啫？
陳：無拍拖，你係咪想問我感情世界？你好似神神秘秘，好似搵到個位可以問佢咁樣？
蓋：你真係未拍過拖？
陳：咁睇吓你嘅拍拖定義係點樣。
蓋：拍拖定義係會拖手、接吻。
陳：無喎，咁我就真係無拍過拖，我從來都無覺得有人鍾意過我，或者對我有意思，男嘅又無，女嘅又無，無人鍾意過我。
蓋：咁你都會有自己鍾意嘅人？
陳：呢樣好好彩，我好細個小學嘅時候有啲幻想，即係嗰個同學仔好靚，後來做六十歲嗰個騷嘅時候，個小學同學出嚟，我話好彩嗰個只係我嘅幻想，乜佢變成咁樣嘅。
蓋：個個都會變㗎啦？
陳：但細個嘅時候覺得佢好靚㗎嘛，點解而家變成咁樣嘅。另外大學時有個同學仔，嗰時好靚，全班最靚係佢，點知又係最近籌備嗰個舞台騷之前見番佢，我愕咗然，原來外貌真係唔可以依靠，你愛一個人係要從心去愛，但我諗自己係一個好自我中心嘅人，如果你同我做朋友，我有樣好乞人憎嘅嘢，就係我好怕約定你，如果你約定我三個星期、兩個星期後呢，到時我多數會爽約。
蓋：我都係咁樣㗎，我唔鍾意有時限，除咗工作，無得選擇之外。
陳：工作我就鍾意，工作方面我好想知道排咗啲乜嘢，我可以盡早做準備，但我好怕到時就會唔想去。
蓋：我要即興。
陳：我都係㗎，所以好乞人憎。同埋拍拖有個伴，其實有好有唔好，如果你行商場，大家興趣唔一樣。
蓋：咁咪分開行囉。
陳：咁拍拖嚟做乜呢？大家好似旅行團咁樣。
蓋：食飯係一齊㗎，只不過之後分開行之嘛。
陳：無錯，但我識好多年青人而家拍拖，總係好似糖黐豆咁樣。
蓋：你係唔鍾意糖黐豆方式？你鍾意㗎，因為你話分開行街唔好嘛。
陳：我覺得好似旅行團咁樣，30分鐘後集合。
蓋：係咁㗎啦！
陳：係咁㗎咩？
蓋：好難所有嘢都一齊做。
陳：我覺得咁樣，老吾老以及人之老，幼吾幼以及人之幼，我諗拖唔拖都係以及人之拖嘅啫，好多好朋友，好似兄弟姊妹咁樣都幾好吖，同埋我發覺自己都係唔可以同人哋一齊生活。
蓋：我都係，因為我一個人生活咗太耐，有好多嘢會嫌棄，我接受唔到，原來係唔夠愛你。
陳：唔係愛唔愛嘅問題，而係要有番自己，我要有番自己空間，同埋我有好多狀況之下唔想俾你見到，又或者我同你喺埋一間屋、一間房，有乜可能你會見唔到我咁嘅狀況。
蓋：好騷擾。
陳：直情係干擾。
蓋：我嘅要求就係如果我同人一齊生活，我一定要兩間套房。
陳：最好係兩間屋，兩間套房都好。
蓋：可能比較浪費金錢。
陳：如果可以嘅話，係咪最好兩間屋吖？最好係咁樣，因為你有自己嘅空間。
蓋：呢個舉動係咪因為愛錫自己？
陳：唔係呀，我覺得咁樣係啱㗎喎，一啲啲人啦，有啲人覺得咁樣係啱㗎喎，因為相見好同住難，有好多細節。但你有拍拖經驗，會唔會同意，其實拍拖唔係成日見住，比日日見住會好啲？
蓋：當然啦，非常好呀，咁樣先至有掛住嘅感覺，日日見係會厭惡，會覺得又係你呀？
陳：乜你咁㗎，咁我又未有咁嘅經驗，我連寵物都唔敢養。
蓋：我有養寵物。
陳：咁你愛心比我多。
蓋：但人就仲未搵到一個，佢唔沖涼跳上床我都覺得無問題，我仲未搵到，會嫌棄。
陳：唔沖涼就跳上床，咁梗係唔得喇，仲要叫佢消埋毒呀。
蓋：好多人係可以㗎，愛係可以大過一切。
陳：我覺得唔係，只係佢哋污糟啫，唔係愛。
蓋：你會唔會考慮拍拖？呢一生就咁就放棄？
陳：六十歲喇，仲點樣拍拖？
蓋：我媽咪七十歲喇，佢都話仲想拍拖喎。
陳：咁我唔係你媽咪吖嘛。
蓋：就係唔關歲數事囉。
陳：係唔同人嘅事囉，不過咁樣，如果你對陳志雲有興趣嘅話，咪即管嚟向我表示吓囉。
策劃：肥A
攝錄：黃志明、蕭敬漁
蓋世寶髮型及化妝品：波兒（嫁妝）
立即下載《壹週刊》Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
相關新聞：
【迷雲黨黨羽】從未與王喜嗌過交被鄧健泓叫做Honey 陳志雲：可想而知佢有冇腦｜每日封面
http://bit.ly/2FlbM2D
【也許相愛很難…】分手7年再相聚 蓋世寶：佢已經有自己一個家庭 林景弘：記得佢生日，就會諗起佢
http://bit.ly/2TQThMU
【父母內地有廠房】12年離開TVB北上拍劇 42歲林景弘：呢個年齡仲要靠屋企幫手都幾醜
http://bit.ly/2FfY5lG
【蓋世寶訪問戴志偉】藝人收入低 每晚走6場唱歌搵錢 戴志偉：我係唔捱得窮嘅人
http://bit.ly/2NVOIM1
【蓋世寶訪問戴志偉】無綫工作30年劈炮唔撈 轉做地產再做保險 戴志偉：過嘅生活似番一個人
http://bit.ly/2NNoafM
【入行23年由主持做到變二打六】續約要減1/3人工僅得七千 蓋世寶劈炮：真係夠喇！
http://bit.ly/2UUMpuQ

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...