狗仔死過番生 泳兒來回地獄又折番人間

屋企原本已經養咗兩隻狗嘅泳兒(Vincy)，最近突然增加咗三位「家庭成員」。呢三隻小貓就係早前Vincy參與香港愛護動物協會(SPCA)救援車隊時拯救番嚟，佢仲幫呢三隻貓仔改咗名，分別叫「泳衣」、「泳帽」同「泳褲」。

噚日，Vincy喺自己嘅社交網站post咗佢早前參與SPCA嘅救援行動，出發前，Vincy心情有啲矛盾，「如果今日好多狗要救，其實係一件唔開心嘅事；但係救到佢哋嘅話又係一件好開心嘅事。」去到SPCA冇耐，Vincy就收到order即刻出發，第一單case就係救一隻喺迪士尼俾車撞到嘅龜。去到現場，隻龜已經被放咗入箱，Vincy一睇，龜嘅尾部已被車爆，SPCA嘅人員就話：「拎番去俾獸醫，睇吓救唔救到。」

救咗隻龜後，隨即接到第二單case：拯救被遺棄嘅三隻小貓。去到「案發現場」，三隻小貓被遺棄咗喺垃圾站，Vincy即刻上前安撫小貓，「邊個咁衰遺棄你哋呀。」然後小心奕奕將三隻小貓放入籠。最後一隻貓仔受驚過度，Vincy拎起佢放入籠嘅時候話：「呢隻硬晒呔。」

準備回程時，佢哋又收到order要去救一隻喺樹上面跌咗落嚟嘅貓頭鷹。Vincy一行人到達後，SPCA嘅人員用毛巾包住小貓頭鷹幫佢作初部檢查，然後就遞俾Vincy叫佢抱吓，「佢個樣好好奇呀，佢（個頭）真係360度轉，我哋而家送佢去嘉道理農場。你睇佢好驚呀，好啦，我哋搵新屋企俾你。」

呢日行程緊密，救完貓頭鷹後，佢哋又接到通知去救一隻被困山坡嘅狗仔。一落車，Vincy就跑到山坡睇吓隻狗仔情況，「見到喎，但係佢唔郁嘅？(主人話：應該死咗。)吓！死咗？」Vincy再睇多咗一陣，然後好興奮咁話：「佢郁㗎！我見到佢個鼻呀！」SPCA人員隨即落山坡，Vincy都落埋去幫手，二人成功將狗仔固定，Vincy就坐到山坡邊將狗仔抱番上路面，成功將狗仔救出，Vincy勁開心對住狗仔講：「冇事冇事冇事！」

事後Vincy話最心開就係救狗仔，「我見到佢個頭郁，嘩！(心情)嗰下即刻由谷底上番天堂呀！我初初淨係見到佢隻手，唔郁㗎，跟住無啦啦見到佢個頭左搖右擺，但係我哋一落去佢就吠我哋喎，哈哈，佢知我哋嚟救佢嘅。今日係一個happy ending！」

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...