【設計師鬥快Bid】室內設計及裝修配對平台公開投標 業主免中伏

過去壹仔報導過不少業主因為裝修「爛尾」或貨不對辦，而蒙受損失的情況，「室內設計或者裝修工程好容易聯想到，會唔會有危險，或者信唔信得過?好似對室內設計同工程都係半信半疑。」有見及此，林鎮豪(Clarence)聯同其他五位合夥人在上年成立Spaceplan，為業主和室內設計師提供一個一站式室內設計及裝修顧問平台，方便業主同是為其提供保障，亦令到設計師有更多曝光機會。

Spaceplan為業主提供前期顧問服務，只要業主提供附有尺寸的平面圖，平台的內部設計師會了解業主的設計要求及根據預算，製成標書放到平台上，予設計公司投標報價。曾從事室內設計的聯合創辦人Clarence在成立Spaceplan時反思，以前做室內設計時遇過不少困難，「譬如我哋永遠都好被動，唔知道下一單工程係幾時，商業定係住宅 。」不少港人談到室內設計都不外乎「搵朋友」介紹，令香港不少設計師都缺乏曝光機會，「如果有一個平台篩選到好的室內設計公司，俾顧客選擇，公司可以選擇不同項目報價，咁成件事就會更流暢。」

香港設計公司多，Spaceplan怎樣保障自己和業主不會中伏呢? Clarence表示除了要求公司上載商業登記證和過往真實的設計圖片外，還有一招殺手鐧，Spaceplan會相約設計公司到先前其設計的單位相談，「如果單位嘅業主，都願意俾我哋Spaceplan嘅人員去睇，咁証明兩者關係處理得唔錯，當然最重要，睇番手傢私，係咪業內人士準則，然後先可以審批佢上我哋嘅平台。」

相比封閉的市場，在一個有競爭的環境下，將單位製成標書放在公開平台投標，Spaceplan話可以令到修裝價錢更貼地，「公司報得價，咁代表佢本身工程未飽和，佢地有一班師父要養住嘅時候，佢又未必有咁忙嘅單，佢哋當然唔會報得太貴，嚇親人。」

Spaceplan由六位合夥人組成，比其他Startup多，六個人六把口，會唔會因此多磨擦呢?Clarence大拍心口話唔會，因為大家各施其職，例如自己就主力室內設計的部份，其餘合夥人之前從曾從事裝修、會計、IT及市場營銷等的工作，分工仔細，自然減少不必要的爭執，合夥人中最為人熟悉當然是藝人狄易達，藝人做生意可以碌「人情卡」，亦係招牌保證，難怪當記者問到平台的構思會不會很容易比人抄襲時，Clarence就不假思索話「狄易達只得一個」要抄唔係咁易嘅。

撰文:陳世鍾
攝影:蔡福生

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...