【藥房之王爭霸戰】龍豐藥房vs 莎莎 決戰上水旺角之巔

龍豐藥房一直盤據上水，多年來受惠於自由行，在上水區內開八間分店，反觀作為藥妝龍頭的上市公司莎莎(00178)在上水只有六間分店，生意竟不及龍豐。近日龍豐與莎莎之爭升溫，由旺角鬥到上水，再由上水鬥番出旺角！

今年初，莎莎逼住殺入最墟冚的上水石湖墟內插旗分杯羹，在張人龍家族名下的「張知行」大廈，以四十五萬承租二千呎鋪位，平均呎價225元，同龍豐打對台，租金已直逼尖沙咀水平！近日龍豐又再出招，以天價二百萬元在旺角通菜街租舖開旗艦店，面積達6,700平方呎，平均呎價約310元，呎租不僅高於莎莎在上水的新舖，盛滙商舖基金創辦人李根興更形容是「在香港歷史上是破天價」。

李根興直指對有藥房以過百萬元月租舖聞所未聞，更別說二百萬以上的月租。他分析龍豐此部署是為了擴大客源，「做藥房分兩批客，係北區嗰啲係『搵錢嘅客』，擺到明係啲水貨客落到嚟送完貨就返去大陸，但係嚟到呢度就自由行多，呢啲係『使錢啲嘅客』，係自己買來自己食，或者係送俾親戚朋友多嘅，所以佢哋會豪爽啲，係北區就會手緊啲嘅，所以喺呢度嘅策略都係建立品牌之餘，當然能夠搵多啲錢。」

有地產經紀預言：「龍豐老闆謝少海，係未來個郭少明。」 回顧兩者發跡史，莎莎最初在銅鑼灣總統商場開業，郭少明夫婦於1978年頂手莎莎生意，不足二十年後上市，將莎莎從當初一個40呎商場櫃位，搖身一變成為化妝品王國。謝少海則創辦龍豐至今第26年，藥房生意一直雄霸北區，身家保守估計已逾8億元。二人同樣以賣水貨起家，以便宜取勝，惟諷刺的是，兩者曾同被爆牟利黑幕，包括龍豐於11年被列入消委會公佈的賣假藥名單上；莎莎則於14年被傳媒揭發毀貨品有效日期標籤冒充新貨。

李根興直指龍豐可能藉旺角旗艦店「洗一洗底」，「龍豐藥房前幾年嘅時候被人哋打入（賣假藥）黑名單，消委會都點名批評，甚至乎被人罰款，因為可能買啲藥嘅時候唔係太過正規，但人就係咁㗎啦，發財立品， 咁而家能夠可以做大啲嘅時候，希望建立翻個品牌嘅時候，畀個消費者更加大嘅信心。」

二人的確有相似之處，不過郭少明由一個隧道收銀員，升呢為今天的上市公司主席，功勞要歸老婆大人，當年其妻獨具慧眼，用存款及從外家籌錢開舖，才有莎莎今日的成就。而不曾向傳媒透露家庭背景的謝少海，是否也有個賢內助，就不得而知了。究竟莎莎及龍豐接下來何者會跑出、在自由行生意上鹿死誰手，仍需拭目以待。

撰文：財經組

攝錄：財經組

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...