【《深宮計》大快人心】娜姐得知滑胎真相嬲到震 胡定欣被廢開始倒數

《深宮計》嘅對白入面成日有句「多行不義必自斃」。嚟到第33集（7月4日星期三晚播），三番四次陷害周秀娜嘅胡定欣，終於紙包唔住火，做過嘅衰嘢被娜姐同劉心悠知道晒喇！到底娜姐係點樣識破定欣嘅惡毒呢？原來係貫徹《深宮計》敘事手法，繼續由涉事角色爆響口講晒啲犯事經過出嚟。

話說定欣心腹醫工──茗風，被娜姐識破佢就係喺紫蘭湯外大叫「有刺客」，從而老屈娜姐同馬明有姦情嘅假宮婢。茗風被娜姐威嚇兼用髮簪狠狠插咗一嘢後，乖乖講出紫蘭湯一事嘅真相。之後茗風仲誇張過食咗哆啦A夢誠實豆沙包，喺無人問佢嘅情況下，自己自動自覺將定欣陷害娜姐嘅所有重點經過，一五一十自爆出嚟，包括「火燒藏書閣」、「石擊甘若芊」、「金鵲害滑胎」。對於呢種交代情節嘅「高明」手段，相信觀眾已經「彈」到口水都乾埋，反正仲有幾集就完（共36集），睇開啲啦，而且終於等到多行不義嘅定欣快要被斃，真係越諗越大快人心。
另外，唔少人都話劇中嘅娜姐演技麻麻，但就喺佢同定欣對質嘅一幕戲當中，相信大家都會改觀！佢嗰種對眼前仇人不能除之而後快嘅不甘、怒火，以及此仇不報誓不罷休嘅決心，溢於言表。

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...