【八卦陣】何鍾泰話當年 排隊插班入培小

個個父母都係望子成龍，排隊報名爭入名校近年時常都見到，但原來呢股風氣幾十年前已經出現，唔係近年先至有。卸任議會及人大等公職多年的前立法會議員何鍾泰，上星期為一個徵文比賽做嘉賓致辭，提到自己轉校去老牌名校培正小學做插班生嘅經歷，佢話自己幾十年前仲係小學三年班時讀緊深水埗小學，成績尚算不錯，但因為阿媽見培正多人排隊，就跟人排埋一份幫佢報名。

佢仲記得當年嘅插班試有一百五十人參加，坐滿三個課室，但只收九人，結果佢考到第一名，佢自此就與培正結下不解緣，又大讚母校教育重視誠信，令他學識誠信的重要性，佢亦因為咁，佢〇八年至一二年度擔任最後一屆議員時獲推舉做雷曼迷債調查委員會主席，當時連「長毛」梁國雄因為知道一旦唔守規矩會被趕出場，所以會坐定定乖乖地開會。

何鍾泰講咁多誠信，原因係呢次徵文比賽由培正前校董兼校友顧明均及黎藉冠贊助，以「校監誠信」為主題，以大額獎金吸引投稿，雖然校友同家長組有唔少參賽作品，但中學組只有一人參賽；小學組就無人報名喇。顧明均兩年前為捐款風波及誹謗案與培正辦學團體浸聯會對薄公堂，佢話官司已打完前哨戰，估計要花七年時間先至打得完。

撰文：巫不言

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...