【香港有路】大道中 譯錯名 女皇被失蹤

無論中環最中心的皇后大道中、越來越多特色小店的皇后大道西，以及羅大佑的最愛皇后大道東，英文都叫Queen’s Road，大家叫咗咁多年，有無諗過條街譯錯名，大家咁多年亦都叫錯？

無錯，Queen可以解作女皇或者皇后，但當初英國佬殺到，建立Queen’s Road紀念英皇維多利亞，條女明明係女皇，唔係皇后，最衰中國人社會父權，向來只有皇帝，沒有女皇，即使出過武則天，但都叫皇帝。當時香港人沒有女皇概念，如此這般，條街譯做皇后大道。

女皇有權，皇后未必，街名錯譯，變相將維多利亞削權，佢做鬼都唔放過你，嗱，你搵梁振英好喇，鬼叫佢做特首都唔改街名。之前港督又點？其實1890年香港政府認低威，澄清Queen’s Road應該叫女皇大道，不過將錯就錯費事改。

講開又講，這個Victoria都幾惡，維多利亞港又係佢，維多利亞公園又係佢，以前甚至有座維多利亞山，可能後來有人對佢不滿，改叫扯旗山──我無講咩，扯英國旗之嘛──最後息事寧人，叫太平山最太平。

以前仲有間維多利亞書院Victoria College，又係呢個女人，後來改名Queen’s College，都仲係佢。同一條數，點解Queen’s中文唔叫女皇，而叫皇仁？未必譯錯，只是記者無知，可能要問米，問問孫中山，不過他就讀時皇仁仍叫大書院。

 

撰文：陳勝藍

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...