【高跟鞋玩cosplay】露玉腿演空姐之苦 區議員麥德正：整條裙爆開到大腿

工黨上個週末舉行六週年黨慶晚宴，雖沒有華裝盛會，也沒有冠蓋雲集，但不乏民主派政團及工會友好賞臉捧場，歡慶聯誼之餘不忘籌募吓經費。

叫得做黨慶晚宴，娛賓環節少不了，今勻工黨主席郭永健與副主席麥德正事先張揚會有「驚人演出」，原來兩人換上黑色短裙，腳踏高跟鞋玩cosplay，在職工盟主席兼工黨倡議幹事吳敏兒指揮下充當空姐，先由麥德正模擬空姐抬行李上客，並郭永健捧飲品招待由社民連岑子杰扮演的「貴客」，讓兩人感受吓空姐工作在三萬呎高空工作，其實係幾咁辛苦。

經過一輪表演，當然要由主角講吓感受，麥德正直言着裙工作唔容易：「第一爆裙啦，一蹲下，整條裙子就爆開了，到大腿。」至於女士們着高跟鞋苦處，佢就有親身經歷：「因為我攞我老婆的高跟鞋來玩，已經知道了。」而人高腳長嘅郭永健就因為腳掌太大，冇呢方面「經驗」啦。若果要日日以短裙高跟鞋裝扮返議辦開工，身兼東區區議員嘅麥德正就好堅決咁話免喇：「我寧願唔選區議員啦！」「慘過死呀！」

表演完一輪，郭永健同麥德正就火速換返條長褲，繼續滿場走招呼各路友好。麥德正話條裙其實好窄，連拉鏈也扣不到，着上後已經爆開咗，但當時仍繼續頂硬上，完成表演。

工黨正副主席露腿傾力演出，換來台下笑聲連連，之不過，充當旁白的「真正空姐」吳敏兒都大嘆頂唔喇。她隨後同《壹》仔講，話今次係自己有生以來第一次見到咁多腳毛，認真無眼睇咁話喎。

撰文：巫不言

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...