【每日壹爆｜港鐵老人俱樂部】負責監察？4大前高官年袋港鐵近200萬 陳帆一樣有錢攞

港鐵沙中線醜聞愈揭愈臭，林鄭都只係用口講話會嚴肅處理，運房局局長陳帆對於呢單臭到冤嘅醜聞，未有好似上場做官時去為事件「哽咽」一下，交唔足戲喎！梗係啦，唔通去打爛啲退休同僚嘅飯碗咩！
由政府揸住近75％股份嘅港鐵，入面董事局坐滿咗唔少退休高官，簡直喺退休高官俱樂部。年過六、七十歲，學得羅致光講咁「年青」，食長糧之餘每年仲可以袋番四、五十萬嘅袍金，又可以免費搭地鐵，你都咪話唔過癮！2017年度港鐵淨係派董事袍金，一年就派咗成千萬，錢就派咗喇，監察唔到啲乜噃！原來孭住「前度」高官個銜頭，做吓港鐵獨立非執董，真係咁鬼過癮嘅，好似前度消委會主席陳黃穗，今年都73歲囉，2017年攞番40萬袍金，前度運輸署副署長陳阮德徽，今年有70歲，每年又攞番50萬董事袍金，前度審計署署長鄧國斌，今年68歲又有40萬，最後生嗰位退休高官，喺65歲嘅前度庫務處處長李李嘉麗又攞50萬，呢班獨董袋嘅袍金較2016年每人仲多咗十萬。唔好以為淨係退休高官有錢攞呀，由政府委任嘅高官坐落去港鐵雖然都係「份內事」但都有錢攞㗎，運輸及房屋局局長陳帆，發展局常任秘書及運輸署署長各人每年都收40萬袍金。
怪唔之得林鄭同陳帆對港鐵醜聞咁忍口，作為公務員，又點會做衰人打爛自己友嘅退休飯碗呢？
撰文：宗菁華

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...